Zarif: Irani nuk është kërcënim për sigurinë e asnjë vendi

Zëvendëspresidenti i Iranit për Çështjet Strategjike, Mohammad Javad Zarif, tha se Irani nuk përbën kërcënim për sigurinë e asnjë vendi, duke theksuar se nëse Republika Islamike do të kishte synuar të zhvillonte armë bërthamore, do ta kishte bërë këtë shumë kohë më parë.

Zarif po fliste me prezantuesin e CNN, Fareed Zakaria, në takimin vjetor të Forumit Ekonomik Botëror (WEF) në Davos, Zvicër.

“Irani nuk është një kërcënim për sigurinë. Disa po përpiqen ta paraqesin Iranin si një kërcënim për sigurinë dhe përdorin mjete si Iranofobia dhe Islamofobia për të justifikuar veprimet e tyre kundër njerëzve të pafajshëm, përfshirë Gazën. Megjithatë, këto pretendime nuk kanë bazë reale”, tha ai. 

Zarif, i cili udhëhoqi bisedimet bërthamore me fuqitë botërore që kulmuan me marrëveshjen bërthamore të vitit 2015, tha se ata që pretendojnë se Irani është në prag të zhvillimit të një bombe bërthamore, duhet të kishin mirëpritur marrëveshjen bërthamore, e cila ishte krijuar për të parandaluar Iranin nga marrja e armëve bërthamore për të paktën 15 vjet.

“Irani ka qenë gjithmonë i gatshëm për dialog dhe bashkëpunim me vendet e rajonit. Propozimi ynë për krijimin e një mekanizmi të dialogut rajonal të quajtur 'Forumi i Dialogut të Azisë Perëndimore' pasqyron angazhimin tonë për paqen dhe stabilitetin në rajon”, tha ai.

Duke vënë në dukje paralajmërimet e kahershme të kryeministrit izraelit Benjamin Netanyahu në lidhje me marrjen e një arme bërthamore nga Irani brenda gjashtë muajve, Zarif tha se kanë kaluar gati 30 vjet që nga fillimi i këtyre pretendimeve, por Irani vazhdon të etiketohet si një kërcënim eminent.

Zarif reflektoi mbi historinë e rezistencës në rajon, duke thënë se koncepti ka ekzistuar si para ashtu edhe pas Revolucionit Islamik në Iran. Ai përmendi pushtimin e Libanit në vitin 1982 nga Izraeli si një moment kyç që çoi në krijimin e grupeve të rezistencës si Xhihadi Islamik, Hezbollahu dhe Hamasi.

"Rezistenca do të vazhdojë të ekzistojë për sa kohë të ketë pushtim, aparteid dhe gjenocid”, tha ai.

Zarif përsëriti se grupet e rezistencës nuk veprojnë nën kontrollin e Iranit, por shtoi se ndërsa Irani mbështet të drejtat e popujve për vetëvendosje, këto grupe luftojnë për kauzat e tyre.