Presidenti i Iranit zotohet të përshpejtojë bashkëpunimin me Rusinë

Presidenti iranian Masoud Pezeshkian është zotuar të rrisë marrëdhëniet Iran-Rusi duke ndjekur shpejt marrëveshjet dypalëshe dhe duke mbajtur ndërveprime konstruktive për çështjet rajonale.

Gjatë një takimi me ministrin e Jashtëm rus Sergei Lavrov, Pezeshkian i cilësoi marrëdhëniet dypalëshe "në rritje" dhe theksoi nevojën e përshpejtimit të zbatimit të marrëveshjeve, veçanërisht marrëveshjes gjithëpërfshirëse strategjike mes dy vendeve.

“Irani dhe Rusia kanë kapacitete të dukshme për të rritur bashkëpunimin e tyre dhe ne jemi të vendosur të forcojmë ndërveprimet midis Teheranit dhe Moskës”, tha ai.

Ai theksoi më tej rëndësinë e një angazhimi të vazhdueshëm dhe konstruktiv mes dy vendeve.

“Irani dhe Rusia kanë përafruar ngushtë perspektivat për çështjet rajonale dhe po kërkojnë të forcojnë bashkëpunimin e tyre rajonal dhe ndërkombëtar, si përmes ndërveprimeve dypalëshe ashtu edhe nëpërmjet organizatave si Organizata e Bashkëpunimit të Shanghait, Bashkimi Euroaziatik dhe BRICS-it”, tha presidenti.

Ministri rus theksoi gjithashtu se do të bëhen të gjitha përpjekjet për të mbështetur dhe përshpejtuar bashkëpunimin në rritje dhe zbatimin e marrëveshjeve dypalëshe, veçanërisht marrëveshjen gjithëpërfshirëse strategjike.

Lavrov tha se përfundimi i pranimit të Iranit në Bashkimin Ekonomik Euroaziatik do të sigurojë një kanal të ri dhe efektiv për të forcuar marrëdhëniet dypalëshe - veçanërisht në fushat ekonomike dhe tregtare.

“Irani dhe Rusia kanë shumë interesa të ndërsjella në ruajtjen e bashkëpunimit efektiv rajonal”, vijoi ai.

Irani dhe Rusia kanë thelluar bashkëpunimin mes tyre gjatë viteve të fundit. Të dy vendet janë nën sanksionet perëndimore.

Në janar, Pezeshkian vizitoi Moskën dhe nënshkroi një marrëveshje partneriteti strategjik me presidentin rus Vladimir Putin për të forcuar bashkëpunimin ekonomik dhe ushtarak midis dy vendeve.