Zarif: Referendumi në Kurdistanin irakian rrezikon stabilitetin e rajonit

Ministri i Jashtëm i Iranit theksoi se respekti për kufijtë dhe integritetin territorial të të gjitha vendeve është i rëndësishëm dhe se referendumi mbi ndarjen e rajonit të Kurdistanit të Irakut minon stabilitetin dhe sigurinë e rajonit.

Muhamed Xhavad Zarif në një intervistë për kanalin Al-Jazeera të Katarit, tha se Irani e konsideron të paligjshëm dhe jokushtetues referendumin mbi ndarjen e rajonit të Kurdistanit të Irakut. Ministri i jashtëm i Iranit tha se Republika Islamike e Iranit ishte një përkrahës i përhershëm i popullit kurd të Irakut, duke thënë se Irani ishte një nga vendet e para që ndihmoi rajonin e Kurdistanit irakian të përballej me grupin terrorist  ISIS. Muhamed Xhavad Zarif, duke theksuar se Irani është dhe do të jetë mik i rajonit të Kurdistanit të Irakut, shtoi se referendumi separatist në rajonin e Kurdistanit të Irakut nuk është në interes të rajonit dhe të miqve kurdë të Iranit. Nga ana tjetër, një komandant i lartë ushtarak iranian tha se Irani dhe Iraku do të mbajnë manovra të përbashkëta ushtarake përgjatë kufirit të tyre me rajonin e Kurdistanit në ditët në vijim, në përputhje me politikën e Teheranit për të mbështetur qeverinë qendrore të Bagdadit, pas referendumit të fundit të pavarësisë në rajonin gjysmë autonom. "Manovra e përbashkët, e quajtur" Ektedar (Forca) ", do të mbahet nga Forcat e Armatosura të Iranit dhe njësitë e ushtrisë irakiane përgjatë kufijve të përbashkët të dy vendeve," tha të shtunën zv/shefi i Shtabit të Përgjithshëm të Forcave të Armatosura të Iranit, gjeneral Masud Xhezairi.