Izraeli nuk është në pozitë ta quajë Iranin kërcënim për rajonin

Presidenti iranian Hasan Ruhani deklaroi se regjimi izraelit nuk është në pozitë ta quajë Iranin një kërcënim për Lindjen e Mesme, duke theksuar se zhvillimi i programit raketor të Iranit ka për qëllim ruajtjen e paqes dhe sigurisë.

"Ata që gjatë 70 viteve të fundit kanë krijuar tensione, kanë filluar luftëra dhe kanë shkaktuar shkatërrime në rajon dhe kanë kryer gjenocidin në  Sabra dhe Shatila, nuk janë në gjendje ta portretizojnë Iranin si një kërcënim", tha Ruhani gjatë një sesion të kabinetit qeveritar të mërkurën. "Irani nuk është kërcënim për askënd. Irani është shtylla e stabilitetit dhe sigurisë për të gjithë rajonin. Por sigurisht që do t'i mbrojë me forcë të drejtat e tij, "shtoi ai. Presidenti iranian i bëri komentet një ditë pasi kryeministri izraelit Benjamin Netanjahu pretendoi se Irani ishte përgjegjës për "errësirën që po kaplon" Lindjen e Mesme dhe tha se Izraeli përballet me kërcënime nga Republika Islamike. Ruhani kritikoi përpjekjet e disa vendeve të rajonit për të nxitur Iranofobinë, duke thënë se Irani kurrë nuk kishte pushtuar dhe nuk do të pushtonte asnjë vend. "Historia tregon se kombi iranian nuk ka pushtuar kurrë asnjë vend. Ne kurrë nuk kemi bombarduar fqinjët tanë dhe nuk kemi shantazhuar popujt e rajonit. Jo vetëm që nuk kemi dëbuar popujt nga vendet e tyre, por ne kemi mirëpritur refugjatët, "vuri në dukje presidenti i RII. Irani kërkon progresin dhe prosperitetin e të gjitha vendeve rajonale, tha Ruhani, duke theksuar se fuqia ekonomike, politike dhe ushtarake e Iranit synon parandalimin e agresioneve të vendeve të tjera. "Armët tona kanë për qëllim të promovojnë paqen, të forcojnë stabilitetin dhe sigurinë dhe të parandalojnë të tjerët të mendojnë për pushtimin e vendit tonë. Prandaj, askush nuk duhet të jetë i shqetësuar për armët e Iranit, raketat apo forcimin e potencialit mbrojtës të tij, "theksoi Ruhani.