OKB: Nëse SHBA braktis marrëveshjen bërthamore me Iranin, rrezik lufte

"Nëse Shtetet e Bashkuara do të braktisin marrëveshjen bërthamore të Iranit, atëherë kemi një rrezik të vërtetë lufte.”

Ka qenë ky paralajmërimi i Sekretarit të Përgjithshëm të OKB, Antonio Guterres, pak ditë përpara se presidenti Donald Trump të vendosë për fatin e akordit të nënshkruar në 2015. Sekretari i Përgjithshëm i Kombeve të Bashkuara Antonio Guterres i ka bërë thirrje Donald Trump të mos braktisë marrëveshjen ndërkombëtare të projektuar për të parandaluar zhvillimin e armëve bërthamore nga Irani. Guterres deklaroi se ka një rrezik të vërtetë lufte nëse nuk ruhet marrëveshja e arritur në vitin 2015.  “Ky akord është një fitore e rëndësishme diplomatike e cila duhet të mbahet. Nuk duhet ta braktisim, vetëm nëse kemi një alternativë më të mirë. Përballemi me kohë të vështira,”-u shpreh Guterres.