Oferta e Iranit për të bashkuar kurdët sirianë, qeverinë e Damaskut, Turqinë

Ministri i jashtëm iranian ka ofruar të bashkojë kurdët sirianë, qeverinë e Damaskut dhe Turqinë në një përpjekje për të vendosur siguri përgjatë kufirit turko-sirian.

Muhamed Xhavad Zarif e bëri ofertën e ndërmjetësimit gjatë intervistës së tij me TRT World të Turqisë, një fragment të të cilës ai e postoi në faqen e tij zyrtare në Twitter. "Irani mund të ndihmojë në mbledhjen e kurdëve sirianë, qeverisë siriane dhe Turqisë në mënyrë që Ushtria Siriane së bashku me Turqinë të mund të ruajë kufirin," tha diplomati i lartë iranian. Në postimin e tij, Zarif gjithashtu tha se marrëveshja 21-vjeçare e Adanasë midis Turqisë dhe Sirisë që synonte zhdukjen e terrorizmit është akoma e vlefshme dhe mund të jetë "rruga më e mirë për të arritur sigurinë". Marrëveshja Ndër-Shtetërore e Adanasë për Luftimin e Terrorizmit u nënshkrua midis Turqisë dhe Sirisë më 20 tetor 1998. Ajo thotë qartë se qeveria e Damaskut nuk do të lejonte asnjë veprimtari të grupit militant të Partisë së Punëtorëve të Kurdistanit (PKK) në tokën Siriane dhe do të bllokonte çdo veprimtari terroriste që mund të kërcënonte sovranitetin e Turqisë.