Irakianët të shqetësuar nga ndërhyrjet e Emirateve

Një anëtar i parlamentit irakian i ka kërkuar kryeministrit Mustafa al-Kadhimi të shikojë raportet mbi ndërhyrjet nga Emiratet e Bashkuara Arabe në punët e brendshme të Irakut.

Nasser Turki, i Aleancës al-Fatah, kërkoi një takim urgjent midis kryeministrit dhe liderëve të partive politike mbi këtë çështje. Ligjvënësi irakian i tha agjencisë së lajmeve al-Maalomah të Mërkurën se informacioni i siguruar nga udhëheqësit e Aleancës al-Fatah është "i rrezikshëm dhe nuk mund të injorohet". Ai tha se injorimi i një çështjeje të tillë do të "hapte derën për vendet e tjera për të shkelur sovranitetin e Irakut". Anëtari i parlamentit irakian vuri në dyshim qasjen ‘jo konsistente’ të qeverisë në trajtimin e çështjes. Ai tha se Emiratet e Bashkuara Arabe, me kërkesë të Shteteve të Bashkuara dhe regjimit izraelit, po zbatonin një agjendë ‘shkatërruese dhe destabilizuese’ në Irak. Sipas tij, Këshilltari i Sigurisë Kombëtare të Emirateve të Bashkuara Arabe Tahnun bin Zajed Al Nahjan, "blen postet në ministritë irakiane dhe i cakton ato për figura të korruptuara" për të zbatuar këtë agjendë, e cila synon të minojë sigurinë në Irakun jugor dhe qendror dhe të sulmojë Njësitë e Mobilizimit Popullor, të njohura si Hashd al-Sha'abi.