Ambasada amerikane në Bejrut drejton luftën kundër Libanit

Në një fjalim këtë të Dielë, 22 Gusht, Sekretari i Përgjithshëm i Hezbollahut Libanez, Sejed Hasan Nasrallah, foli për luftën ekonomike të zhvilluar nga Shtetet e Bashkuara kundër Libanit.

"Pas kaq shumë vitesh armiqtë tanë ende nuk na njohin. Armiqtë tanë nuk e kuptojnë se çfarë do të thotë të jesh i bindur ndaj Zotit dhe ndaj Imam Huseinit (as) dhe ndaj familjes së tij të shenjtë. Armiqtë tanë na akuzojnë për merkantilizëm, për kërkim të fitimit, sepse ata na gjykojnë sipas kornizave të tyre. Megjithatë, fitimi nuk ka kuptim për këdo që njeh kulturën e martirizimit, të përkushtimit, të sakrificës. Për ne kjo ndjenjë e sakrificës e trashëguar nga besimi ynë, e bën dashurinë për të afërmin qëllimin tonë më të madh ". Më tej, Nasrallah evokoi betejën e Arrogancës globale kundër Rezistencës e cila po vazhdon që nga viti 2005 dhe e cila ka kushtuar dhjetëra miliarda dollarë. "Beteja kundër Rezistencës është një betejë e zhvilluar kundër forcave të vërteta patriotike, forcave progresiste të cilat luftojnë vetëm për popullin e tyre. Në Siri kjo betejë po luftohet në mënyrën më të keqe të mundshme dhe Izraeli nuk heziton të marrë peng aeroplanët civilë në sulmet e tij ajrore ... Në Liban kjo betejë na solli ngjarjet e viteve 2005, 2008, pastaj terroristët u infiltruan në Hermel dhe Arsal. 500 miliardë dollarë u shpenzuan për të gjunjëzuar Hezbollahun, ky ishte pohimi i ish-ambasadorit amerikan Feltman. Dhe kjo armiqësi nga ambasada amerikane në Bejrut po vazhdon pa u ndalur ”, tha Sekretari i Përgjithshëm i Hezbollahut Libanez, Sejed Hasan Nasrallah. Duke iu referuar kundërshtimit të disa politikanëve libanezë ndaj importimit të karburantit nga Irani, Nasrallah tha se disa politikanë kanë frikë nga SHBA më shumë sesa kanë frikë nga Zoti. "Ata kanë frikë se Libani do të sanksionohet nëse blen karburant nga Irani," tha ai. "Ata mendojnë, nga injoranca, se nëse kjo bëhet, sanksionet ndërkombëtare do të vendosen mbi Libanin, gjë që nuk është e vërtetë." Duke thënë se më shumë anije me karburant do të mbërrijnë në Liban së shpejti, udhëheqësi i Hezbollahut vuri në dukje se ato do të mbërrijnë për aq kohë sa kriza vazhdon, sepse qëllimi është "të ndihmojmë të gjithë njerëzit e Libanit dhe të lehtësojmë dhimbjet e tyre".