Presidenti i Libanit përjashton paqen me Izraelin

Presidenti libanez Michel Aun ka përjashtuar mundësinë e paqes me "armikun izraelit", një ditë pasi palët nënshkruan një marrëveshje që demarkon kufirin e tyre detar në Detin Mesdhe.

Mishel Aun zhvilloi një takim me gazetarët të premten për të thënë lamtumirën pasi ai do të largohet nga Pallati Baabda të dielën, në fund të mandatit të tij. “Ideja e paqes me armikun izraelit është jashtë diskutimit,” tha ai, duke vënë në dukje se bisedimet me regjimin izraelit ishin indirekte dhe se marrëveshja u arrit me ndërmjetësimin e SHBA. Ai tha gjithashtu se regjimi sionist “nuk mund të tërhiqet” nga marrëveshja detare. Libani dhe Izraeli të enjten nënshkruan veçmas marrëveshjen e ndërmjetësuar nga SHBA. Dokumentet përfundimtare iu dorëzuan Kombeve të Bashkuara, duke përfunduar një rrugë të gjatë negociatash indirekte prej 12 vitesh. Presidenti libanez i tha kanalit LBCI se Libani "demarkoi kufijtë për të shmangur luftën" dhe se marrëveshja ishte "rezultat i interesave kombëtare dhe stabilitetit". “Nuk ka asnjë dokument apo ndonjë gjë tjetër në procesin e nënshkrimit të marrëveshjes së demarkacionit që mund të tregojë se është bërë një marrëveshje paqeje me armikun izraelit”, tha ai.