Siria dënon grabitjen e burimeve të saj nga SHBA

Siria ka dënuar grabitjen e naftës dhe pasurisë së saj nga forcat pushtuese amerikane, duke i kërkuar Shteteve të Bashkuara të ndalojnë mbështetjen e tyre për grupet terroriste dhe separatiste dhe të tërhiqen me shpejtësi nga territori sirian.

Në një postim në Twitter të shtunën, Ministria e Punëve të Jashtme e Sirisë tha se forcat pushtuese amerikane vazhdojnë të plaçkitin naftën dhe pasurinë e Sirisë duke e kontrabanduar atë përmes Irakut verior në Turqi. “Këto veprime amerikane, të cilat karakterizohen nga banditizmi, bien ndesh me ligjin ndërkombëtar humanitar dhe çojnë në varfërimin e popullit sirian dhe zgjasin vuajtjet e tij”, shkroi Ministria e Jashtme e Sirisë në Twitter. Ajo shtoi se Siria kritikon edhe një herë forcat amerikane për grabitjen e aseteve të saj dhe i bën thirrje administratës amerikane t'i ndalojë ato dhe të paguajë kompensim për popullin sirian, sepse Shtetet e Bashkuara nuk duhet të luajnë rolin e piratëve dhe banditëve. Më herët gjatë ditës, agjencia zyrtare siriane e lajmeve SANA, cituar burime në fshatin al-Yarubiyah, raportoi se forcat pushtuese amerikane kanë vazhduar të plaçkitin burimet e vendit dhe kanë nxjerrë dhjetëra tankerë të ngarkuar me naftë të vjedhur nga fushat siriane drejt territoreve irakiane.