Siri: Disa ushtarë amerikanë u plagosën nga sulmi me dron

Një zyrtar ushtarak amerikan i tha kanalit libanez të lajmeve Al-Mayadeen se një sulm me dron kishte vënë në shënjestër bazën ushtarake amerikane Rmelan, në Siri.

Zyrtari tha se disa anëtarë të forcave të SHBA-së dhe të koalicionit u trajtuan për lëndime të lehta, disa të tjerë iu nënshtruan vlerësimeve për lëndime post-traumatike të trurit, ndërsa të tjerët u evakuuan në një vend të veçantë për trajtim.

Zyrtari ushtarak amerikan pohoi se nuk kishte lëndime serioze mes ushtarëve amerikanë dhe se asnjë grup nuk kishte marrë përgjegjësinë për sulmin.

“Zyrtarët ushtarakë janë ende duke vlerësuar shkallën e dëmit të shkaktuar nga sulmi në bazën Rmelan,” shtoi ai.

Duke cituar burime lokale në Siri, korrespondenti i Al-Mayadeen raportoi se disa shpërthime tronditën bazën ajrore Kharab al-Jir, ku strehohen trupat amerikane në provincën Hasakah, e cila ndodhet në verilindje të vendit. Shpërthimet pasuan një sulm me dron të ngarkuar me eksploziv. Për momentin nuk ka të dhëna të menjëhershme për viktima apo detaje për shkallën e dëmeve.