Sheikh Naim Kasem: Ne nuk dorëzohemi
Zëvendëssekretari i Përgjithshëm i Hezbollahut, Sheikh Naim Kasem përshëndeti Operacionin Stuhia Al-Aksa, i nisur një vit më parë nga Hamasi dhe fraksione të tjera të Rezistencës Palestineze kundër regjimit izraelit.
Ai theksoi se ky veprim shënoi fillimin e një ndryshimi të ekuilibrit të fuqisë në rajonin e Azisë Perëndimore me pjesëmarrjen aktive të Rezistencës.
Sheikh Naim Kasem i bëri komentet të martën, më 8 tetor, gjatë një fjalimi televiziv të transmetuar drejtpërdrejt nga Bejruti me rastin e përvjetorit të parë të Operacionit Stuhia Al-Aksa.
Duke theksuar rëndësinë e Operacionit Stuhia Al-Aksa, ai tha se ky operacion hapi rrugën për një ndryshim të madh në betejën me armikun izraelit.
Zëvendëssekretari i Përgjithshëm i Hezbollahut denoncoi ambiciet e regjimit pushtues izraelit, i cili kërkonte të asgjësonte Boshtin e Rezistencës dhe të masakronte popullin palestinez dhe të zhdukte të drejtat e tij legjitime.
Naim Kasem theksoi se presioni i ushtruar nga Izraeli, Shtetet e Bashkuara dhe vendet perëndimore ndaj Libanit është intensifikuar me qëllimin e qartë për ta nënshtruar atë ndaj dominimit izraelit.
“Ne jemi bijtë e dëshmorit më të madh të Boshtit të Rezistencës, Sejed Hasan Nasrallah. Nuk do të dorëzohemi kurrë. Nuk mund ta përshkruaj situatën tonë pa praninë e Sekretarit tonë të Përgjithshëm të ndjerë, por ne vazhdojmë të frymëzohemi nga qëndrueshmëria e tij".
Ai pretendoi se Shtetet e Bashkuara dhe disa qeveri evropiane janë përgjegjëse për të gjitha mizoritë në Gaza. Sipas Sheikh Naim Kasem, pa mbështetjen e Shteteve të Bashkuara, agresioni izraelit do të kishte përfunduar brenda një muaji.