Amnesty International: SHBA të mos i shesë dronë Emirateve

Amnesty International u ka bërë thirrje Shteteve të Bashkuara të heqin dorë nga planet për të shitur dronë të sofistikuar të armatosur MQ-9B në Emiratet e Bashkuara Arabe, duke thënë se ka prova të vdekjeve civile si rezultat i përfshirjes së Abu Dhabit në konfliktet në Jemen dhe Libinë e shkatërruar nga lufta.

Philippe Nassif, drejtori për Lindjen e Mesme dhe Afrikën e Veriut në Amnesty International, tha se Uashingtoni duhet të përmbahet me vendosmëri nga furnizimi i Emirateve të Bashkuara Arabe me armë që mund të vrasin civilë në Jemen dhe Libi. "Fakti befasues që qeveria e Shteteve të Bashkuara vazhdon mbështetjen e saj të palëkundur për sigurimin e armëve që rrezikojnë të shtojnë numrin e civilëve të Jemenit të vrarë dhe të plagosur në mënyrë të paligjshme nga armët e prodhuara nga SHBA duhet të trondisë në thelb çdo person që jeton në këtë vend," tha Nassif. Javën e kaluar, Departamenti i Shtetit i SHBA-së i dha Kongresit njoftimin për shitjen e planifikuar të më shumë se një duzine dronësh pa pilot MQ-9B në Emiratet e Bashkuara Arabe në bazë të një marrëveshje me vlerë rreth 2.9 miliardë dollarë, më pak se dy muaj pasi Abu Dhabi nënshkroi një marrëveshje të ndërmjetësuar nga SHBA për të normalizuar me Izraelin. Ky vendim vjen pas një njoftimi të mëparshëm për një shitje të mundshme të 50 avionëve luftarakë F-35 në Emiratet e Bashkuara Arabe, në një shitje që mund të arrijë në 10 miliardë dollarë.