Norvegjia dhe Franca heqin shumicën e kufizimeve kundër pandemisë

Norvegjia është bërë shteti i dytë skandinav që ka hequr shumicën e kufizimeve për koronavirus, pavarësisht rritjes së shkallës së infektimit, si pasojë e variantit Omicron.

Autoritetet norvegjeze kanë thënë se shoqëria “duhet të jetojë” me virusin, derisa edhe Franca ka vepruar ngjashëm.

Omicron ka rritur numrin e të infektuarve në Norvegji, mirëpo numri i pacientëve të shtrirë nëpër spitale nuk është rritur.

“Më në fund kemi arritur në pikën kur mund të heqim shumicën e masave shëndetësore me të cilat na është dashur të jetojmë këtë dimër”, ka thënë ministri norvegjez, Jonas Gahr Store, në një konferencë për media.

Më shumë se 781,000 raste dhe 1,440 viktima me koronavirus janë regjistruar në Norvegji prej shpërthimit të pandemisë.

Në këtë shtet, pothuajse 91 për qind e popullsisë është e vaksinuar plotësisht.

Norvegjia ka marrë këtë vendim pas Danimarkës, e cila është bërë shteti i parë i Bashkimit Evropian që ka hequr të gjitha kufizimet për luftim të pandemisë, pavarësisht shifrave rekorde të infektimit.

Ndërkohë Franca ka marrë vendim që nga 2 shkurti të hiqet masa për vendosje të maskës në ambiente të jashtme.

Danimarka ka hequr të gjitha masat kufizuese anti-covid të martën, duke u bërë shteti i parë i Bashkimit Evropian që ndërmerr këtë vendim, edhe pse vendi po përballet me infektime rekorde si pasojë e variantit Omikron.

Nga 1 shkurti, certifikata e vaksinimit apo mbajtja e maskës nuk do të kërkohet në asnjë ambient, të hapur apo të mbyllur.

Nga e marta gjithashtu do të hiqet edhe orari kufizues për baret dhe restorantet.

E vetmja masë që do të ngelë në fuqi, do të jetë ndalimi i hyrjes për të pavaksinuarit që vijnë nga vendet që nuk bëjnë pjesë në Zonën Shengen.