Qiejt e mbyllur të Evropës, Rusia do t'i rihapë me raketa?

Pasi Mali i Zi, Maqedonia e Veriut dhe Bullgaria njoftuan se avioni i ministrit të Jashtëm rus Sergei Lavrov, i cili do të fluturonte për në Serbi, nuk lejohet të kalojë hapësirën e tyre ajrore, kryetari i agjencisë hapësinore ruse Roscosmos, Dmitry Rogozin, kërcënoi këto tre vende të NATO-s me goditje me raketa balistike ndërkontinentale Sarmat, me nofkën “Satan-2”.

Sipas Fars News, Dmitry Rogozin ka pohuar se këto tre vende, megjithëse janë të afta të mos e lënë avionin e Sergei Lavrov të kalojë, nuk do të mund të ndalojnë Sarmat, një raketë prej 208 tonësh që fluturon me shpejtësi 15880 milje në orë. Në Twitter, kreu i agjencisë ruse të hapësirës Roscosmos shkroi: “A e dini se pse është kaq e mirë raketa Sarmat? Ajo nuk do të kërkojë leje fluturimi nga bullgarët frikacakë, rumunët hakmarrës dhe malazezët - që kanë tradhtuar historinë tonë të përbashkët". Ai paralajmëroi se e njëjta gjë mund të presë edhe Suedinë, e cila është gati të anëtarësohet në NATO. Besohet se raketa Sarmat është e aftë të godasë objektivat në një distancë prej 11200 miljesh; që do të thotë se është në gjendje të fluturojë pa vështirësi nga Rusia për të arritur objektivin e saj në Evropë ose Shtetet e Bashkuara. Ekspertët ushtarakë perëndimorë thonë se raketa Sarmat është e aftë të mbajë 10 ose më shumë koka bërthamore, duke e lejuar atë që në një sulm të vetëm të fshijë territore me shtrirjen gjeografike të Francës ose Britanisë. Pak ditë më parë, një zyrtar parlamentar rus tha në kamerën e një emisioni televiziv se Rusia ishte në gjendje të zhdukte të gjithë bregun lindor dhe perëndimor të Shteteve të Bashkuara me vetëm katër raketa. Alexei Zhuravlev, një deputet në Duma, dhoma e ulët e Asamblesë Federale të Federatës Ruse, pretendoi se nuk do të mbetej asgjë në të dy brigjet amerikane pas sulmeve të raketës së re bërthamore ruse Sarmat 2, dhe se reja në formë kërpudhe do të ishte e dukshme nga Meksika. Ai sqaroi: “Unë do t'ju them se për të shkatërruar të gjithë Bregun Lindor të Shteteve të Bashkuara duhen dy raketa Sarmat dhe dy raketa për Bregun Perëndimor. Katër raketa dhe nuk do të mbetet asgjë. Ata mendojnë se reja e kërpudhave do të jetë më e madhe se një rrokaqiell. Kjo re do të jetë e dukshme nga Meksika.” Më herët në maj, gazetari veteran Dmitry Kiselyov reagoi ndaj kërcënimeve britanike kundër Rusisë. "Ishulli i tyre(Britania) është aq i vogël sa që një raketë Sarmat mjafton për ta mbytur atë një herë e përgjithmonë," tha ai. “ Sarmat është në gjendje të shkatërrojë një zonë me madhësinë e Teksasit apo Anglisë. Një nisje, Boris, dhe nuk ka më Angli."