Moska: Sanksionet perëndimore pengojnë rrjedhën e gazit rus në Evropë

Rusia thekson se problemet teknike të shkaktuara nga sanksionet perëndimore ndaj Moskës për luftën në Ukrainë po pengojnë eksportet e gazit rus në Evropë përmes gazsjellësit Nord Stream 1.

Zëdhënësi i Kremlinit Dmitry Peskov tha të martën se "përveç problemeve teknologjike të shkaktuara nga sanksionet, asgjë nuk pengon" furnizimet me gaz në Evropë. Ai i bëri këto komente kur u pyet nëse mund të garantonte që gjiganti energjetik Gazprom do të rifillonte rrjedhat e gazit përmes Nord Stream 1 pas mirëmbajtjes. Gazprom njoftoi se do të mbyllte tubacionin për tre ditë nga e mërkura për të ndërmarrë mirëmbajtjen e një njësie të vetme pompimi në stacionin e kompresorit Portovaya. Gazprom do të rifillojë rrjedhën e gazit përmes Nord Stream 1 pas mirëmbajtjes, tha Peskov. “Vendet e BE-së, Kanadaja, SHBA-ja dhe Britania e Madhe vendosën sanksione kundër Federatës Ruse, të cilat nuk lejojnë kryerjen normale të punëve të mirëmbajtjes dhe riparimit, si dhe nuk lejojnë eksportet e gazit rus në Evropë”, shtoi Peskov. "Nuk ka pengesa të tjera që Rusia të përmbushë detyrimet e saj," tha ai. Bashkimi Evropian, megjithatë, ka akuzuar Rusinë për shkurtimin e furnizimeve me gaz në shenjë hakmarrjeje për sanksionet ndaj Moskës. Ministrja e Energjisë në Francë, Agnes Pannier-Runacher akuzoi të martën Rusinë për përdorimin e furnizimeve me energji si "armë lufte". “Shumë qartë, Rusia po përdor gazin si armë lufte dhe ne duhet të përgatitemi për skenarin më të keq të një ndërprerjeje të plotë të furnizimeve”, tha ajo për radion France Inter.