Macron: Franca do të tërhiqet nga Traktati i Kartës së Energjisë

Të premten, presidenti francez Emmanuel Macron njoftoi tërheqjen e vendit të tij nga Traktati i Kartës së Energjisë (TCE), i cili u miratua në vitin 1994.

Traktati i Kartës së Energjisë (TCE) është kritikuar shumë nga aktivistët e klimës, sepse lejon gjigantët e energjisë të kundërshtojnë vendet që zbatojnë politikat e mbrojtjes klimatike. Sipas IRNA, Presidenti i Francës ka ndjekur rekomandimet e Këshillit të Lartë të Klimës, i cili kërkonte tërheqjen nga ky traktat 30-vjeçar, një traktat që nuk është në përputhje me afatin kohor të dekarbonizimit të parashikuar në Marrëveshjen e Parisit mbi klimën. Rreth 50 vende kanë nënshkruar traktatin, i cili u lejon kompanive të energjisë, veçanërisht ato të lidhura me lëndët djegëse fosile, të ndërmarrin veprime ligjore në gjykatë nëse rregullat janë kundër interesave të tyre. Paneli Ndërqeveritar i OKB-së për Ndryshimet Klimatike (IPCC) e quajti traktatin një "pengesë serioze për zbutjen e pasojave të ndryshimeve klimatike" sepse është "i papajtueshëm" me "agjendat e dekarbonizimit". Vitet e fundit, vende të tjera të BE-së si Holanda janë tërhequr nga pakti sepse besojnë se ai bie ndesh me angazhimet për ndryshimet klimatike të marra në Marrëveshjen e Parisit. Spanja gjithashtu filloi procesin e tërheqjes këtë muaj.