OKB mirëpret rifillimin e lidhjeve midis Iranit dhe Arabisë Saudite

Zëdhënësi i Sekretarit të Përgjithshëm të Kombeve të Bashkuara ka mirëpritur bisedimet që përfunduan me rifillimin e marrëdhënieve diplomatike midis Iranit dhe Arabisë Saudite.

Lidhjet e fqinjësisë së mirë midis dy vendeve të rëndësishme "janë thelbësore për stabilitetin" e rajonit, u tha gazetarëve Stéphane Dujarric në një konferencë shtypi të mbajtur të premten në zyrën e OKB-së në Nju Jork. Në emër të Sekretarit të Përgjithshëm të OKB-së, Antonio Guterres, Dujarric tha se Kombet e Bashkuara janë të gatshme “të avancojnë më tej dialogun rajonal dhe të garantojnë paqe dhe siguri të qëndrueshme” në rajon. Më 10 mars, Irani dhe Arabia Saudite lëshuan një deklaratë duke njoftuar se kanë arritur një marrëveshje për rihapjen e ambasadave në të dy vendet. Deklarata trepalëshe u lëshua në kryeqytetin kinez Pekin. Pas vizitës së Presidentit iranian Ebrahim Raisi në Kinë, Sekretari i Këshillit të Lartë të Sigurisë Kombëtare të Iranit Ali Shamkhani filloi bisedimet intensive me homologun e tij saudit në Pekin që nga 6 marsi për të ndjekur marrëveshjet e arritura gjatë vizitës së presidentit Raisi.