Qindra mijëra i bashkohen tubimit antiqeveritar në kryeqytetin e Polonisë
Qindra mijëra njerëz i janë bashkuar një mitingu antiqeveritar në kryeqytetin e Polonisë përpara zgjedhjeve të përgjithshme që mund të vendosin të ardhmen e vendit në Bashkimin Evropian.
Autoritetet e qytetit të Varshavës thanë se rreth një milion njerëz morën pjesë të dielën në demonstratë, e cila është përshkruar si tubimi më i madh që qyteti ka parë ndonjëherë. Kanali online i lajmeve onet.pl tha se sipas llogaritjeve të tij rreth 600,000-800,000 njerëz morën pjesë në tubim, i cili u quajt si një shfaqje force nga partia opozitare Platforma Qytetare (PO). Udhëheqësi i PO dhe ish-president i Këshillit Evropian, Donald Tusk, tha se demokracia e vendit do të ishte nën kërcënim nëse qeveria nacionaliste Ligj dhe Drejtësi (PiS), e cila ka qenë në pushtet që nga viti 2015, arrin të zgjasë mandatin e saj në vitet e ardhshme. Duke iu drejtuar "Marshimit të miliona zemrave", i cili kërkoi të mobilizonte elektoratin përpara zgjedhjeve të 15 tetorit, Tusk tha se ishte "një detyrë historike" për të hequr PiS nga pushteti. "Ndryshimi i madh po vjen. Kjo është një shenjë e rilindjes së Polonisë," i tha ai turmës në një shesh qendror të Varshavës, duke shtuar: "E pamundura është bërë e mundur, kur shoh këtë det zemrash, kur shoh këto qindra mijëra fytyra të buzëqeshura, ndjej se kjo pikë kthese në historinë e atdheut tonë po afron”. PiS, e cila është zotuar të mbajë jashtë emigrantët, duke i quajtur ata një kërcënim për "sigurinë kombëtare" të vendit, megjithatë, ka mohuar se minon standardet demokratike. "Nëse ia dalim..., do ta largojmë Tuskun. Ku? Në Berlin", deklaroi kryeministri polak Mateusz Morawiecki, duke iu referuar akuzave se Tusk është bashkuar me Gjermaninë kundër Polonisë. Ai madje shkoi aq larg sa e cilësoi Tusk si “burrin politik” të ish-kancelares gjermane, Angela Merkel.
