Erdogan: Turqia do të shpallë kriminel lufte regjimin pushtues sionist

Presidenti turk Rexhep Tajip Erdogan ka njoftuar se qeveria e tij do ta shpallë Izraelin një kriminel lufte, duke fajësuar gjithashtu Perëndimin për masakrën e regjimit sionist ndaj palestinezëve në Rripin e Gazës.

Duke iu drejtuar qindra mijëra mbështetësve në një nga mitingjet më të mëdha pro-palestineze në Stamboll të shtunën, Erdogan tha: “Ne do t'i themi të gjithë botës se Izraeli është një kriminel lufte. Ne jemi duke bërë përgatitje për këtë. Ne do ta shpallim Izraelin kriminel lufte.”

“Izraeli ka kryer hapur krime lufte për 22 ditë, por udhëheqësit perëndimorë nuk mund t'i bëjnë thirrje Izraelit për një armëpushim, e lëre më të reagojnë ndaj tij,” tha ai në një fjalim një orësh.

“Fajtori kryesor pas masakrës së hapur në Gaza është Perëndimi”, tha ai duke shtuar se “masakra në Gaza është tërësisht vepër e Perëndimit”.

Erdogan tha se "çdo vend ka të drejtë të mbrohet. Por ku është drejtësia në këtë rast? Nuk ka mbrojtje, por një masakër e hapur dhe e egër që po ndodh në Gaza".

Ai bëri thirrje për dialog për t'u dhënë fund bombardimeve të Izraelit në Rripin e Gazës, duke thënë: "Askush nuk humbet nga një paqe e drejtë".

Duke kujtuar votat e Asamblesë së Përgjithshme të OKB-së në favor të një rezolute që bën thirrje për një 'armëpushim humanitar' në Gaza, Erdogan tha: "Izrael, je i dënuar të lihesh vetëm".