Londra sërish skenë e demonstratave anti-sioniste

Mijëra protestues demonstruan të shtunën sërish në qendër të Londrës, duke kërkuar një armëpushim në Gaza.

Protestuesit brohorisnin slogane në mbështetje të lirisë së Palestinës dhe përfundimit të bllokadës kundër palestinezëve, dhe disa hodhën edhe sloganin e famshëm "Nga lumi në det, Palestina e lirë do të jetë" dhe e përshkruan Izraelin si " shtet terrorist”.

Policia britanike deklaroi se ka arrestuar një person të dytë për mbajtjen e një pankarte fyese gjatë protestave pro-palestineze në Londër.

Marshimi filloi në Bank Junction në mesditën e sotme dhe përfundoi në Sheshin e Parlamentit, me një zonë përjashtimi që ndalon çdo protestues të mblidhet rreth ambasadës izraelite në Londër.

“Pjesa e përparme e marshimit pro-palestinez ka arritur tashmë në sheshin e Parlamentit ku do të mbahen fjalime. Një arrestim i mëtejshëm është bërë për një pankartë fyese. Janë krijuar kushte të tjera”, njoftuan uniformat blu.

Më parë, një burrë u arrestua nga policia britanike pasi u identifikua me një pankartë që bënte krahasime midis Izraelit dhe Gjermanisë naziste. Fushata e Solidaritetit të Palestinës deklaroi se ata vlerësojnë se mbi 100,000 njerëz morën pjesë në marshimin e sotëm, ndërsa policia e vendosi këtë numër në afro 40,000.