Koha e Izraelit për vetëmbrojtje ka përfunduar

Ministrja e Jashtme finlandeze, Elina Valtonen, duke bërë thirrje për një armëpushim në Gaza, tha se Izraeli nuk mund të pretendojë më se veprimet e tij janë vetëm vetëmbrojtje.

Gjatë një interviste për gazetën gjermane RedaktionsNetzwerk Deutschland, Valtonen tha se në territoret palestineze nevojitet një armëpushim i menjëhershëm humanitar së bashku me një rritje urgjente të ndihmës humanitare.

E pyetur nëse Izraeli mund të pretendojë ende se sulmet e tij janë vetëmbrojtje, ajo tha se “Izraeli sigurisht që ka të drejtën e vetëmbrojtjes sipas ligjit ndërkombëtar, por koha për vetëmbrojtje të menjëhershme ka mbaruar”.

“E them shumë qartë: Mjaft është mjaft”, shtoi ajo.

Gjithashtu, ministrja e Jashtme finlandeze tha se mungesa e ushqimit, ujit të pijshëm, dhe rritja e numrit të viktimave civile, kanë ardhur si rezultat i veprimeve të shtetit izraelit.