BE do të nisë një mision detar në Detin e Kuq

Vendet anëtare të Bashkimit Evropian synojnë të nisin një mision detar në Detin e Kuq deri në mes të shkurtit për të mbrojtur anijet tregtare nga sulmet e luftëtarëve jemenas, tha shefi i politikës së jashtme të BE, Josep Borrell.

Shtatë vende të BE-së janë të gatshme të marrin pjesë në misionin detar duke siguruar anije ose avionë, tha Josep Borrell, duke deklaruar se Belgjika tashmë është angazhuar për të dërguar një fregatë.

Megjithatë, Borrell theksoi se misioni i BE-së nuk do të marrë pjesë në asnjë sulm ushtarak kundër pozicioneve jemenase.

Objektivi i misionit detar është mbrojtja e anijeve, theksoi zyrtari i lartë i Bashkimit Evropian.

Për të drejtuar këtë mision detar, në garë janë Franca, Greqia dhe Italia.

Në solidaritet me palestinezët në Rripin e Gazës, luftëtarët e Rezistencës Jemenase kanë vënë në shënjestër anijet izraelite ose ato që shkojnë drejt dhe nga portet izraelite në Detin e Kuq.

Përkundër faktit se Shtetet e Bashkuara dhe aleatët e tyre kanë formuar një koalicion detar në Detin e Kuq për të mbrojtur anijet e tyre, shumë kompani detare kanë pezulluar kalimin e anijeve të tyre nëpër këtë rrugë ujore dhe kanë lundruar rreth Kepit të Shpresës së Mirë, deri në Afrikën Jugore, duke nisur një rrugë të gjatë dhe të kushtueshme.