Trump anulon mbrojtjen për Pompeon, Brian Hook-un dhe Boltonin

Presidenti amerikan Donald Trump ka revokuar mbrojtjen e sigurisë së qeverisë për ish-Sekretarin e Shtetit Mike Pompeo dhe ish-të dërguarin për Iranin, Brian Hook.

Një punonjës i Kongresit dhe një person i njohur me këtë çështje, të enjten konfirmuan raportet e mëparshme se detaji i sigurisë së Pompeos ishte tërhequr.

Ata thanë se Pompeos dhe Hook-ut iu komunikua humbja e mbrojtjes të mërkurën dhe se ajo hyri në fuqi në orën 23:00, po atë natë.

Duke cituar katër burime të njohura me situatën, New York Times fillimisht raportoi se siguria për Pompeon, si dhe për Hook-un, ishte tërhequr të martën.

Trump tha këtë javë se kishte tërhequr mbrojtjen për ish-këshilltarin e tij të Sigurisë Kombëtare, John Bolton, duke u thënë gazetarëve: "Ne nuk do të kemi ofrim sigurie për njerëzit për pjesën e mbetur të jetës së tyre".

Bolton u shkarkua nga detyra e këshilltarit të Trumpit për Sigurinë Kombëtare gjatë mandatit të tij të parë.

Bolton më vonë shkroi një libër, botimin e të cilit Shtëpia e Bardhë u përpoq ta bllokonte pa sukses me arsyetimin se zbuloi informacione të sigurisë kombëtare.

Bolton tha në një deklaratë se ishte i zhgënjyer, por jo i befasuar nga ky vendim.

Të tre personat shërbyen në administratën e parë të Trumpit dhe udhëhoqën politikën për Iranin në veçanti.

Kjo është një tjetër shenjë e hapave që Trump po ndërmerr vetëm disa ditë pas kthimit të tij në Shtëpinë e Bardhë për të shënjestruar ata që i ka perceptuar si kundërshtarë.

Trump revokoi gjithashtu lejet e sigurisë për dhjetëra ish-zyrtarë të inteligjencës, të cilët nënshkruan një letër në vitin 2020, ku thuhej se saga e laptopit të Hunter Biden mbartte shenjat dalluese të një "operacioni informacioni rus".

Trump e kishte hidhëruar Pompeon disa muaj më parë, duke thënë publikisht se ai nuk do të luante asnjë rol në administratën e tij të re.

Trump, në fillim të kësaj jave tha gjithashtu se ai e kishte "shkarkuar" Hook-un nga një post në institutin e diplomacisë Wilson Center të miratuar nga Kongresi. Hook nuk u është përgjigjur kërkesave për koment.

I pyetur në lidhje me vendimin për t'i dhënë fund sigurisë së Pompeos dhe Hook-ut, Trump iu përgjigj gazetarëve: “A dëshironi të kemi një masë të madhe njerëzish që ruajnë njerëzit për pjesën tjetër të jetës së tyre? Dua të them, ka rreziqe për gjithçka.”

Kjo gjuhë ishte e ngjashme me shpjegimin që ai dha kur u pyet për detajet e sigurisë së Boltonit.