Koment - Si e financojnë gjenocidin në Gaza taksat e qytetarëve amerikanë?

Pars Today - Këmbëngulja e regjimit sionist për të vazhduar luftën e tmerrshme në Gaza në muajin e saj të njëzetë, me gjenocidin ndaj palestinezëve, përdorimin e urisë si armë dhe krijimin e një zie buke artificiale në Gaza, ka çuar në reagime globale, përfshirë edhe në ato Shtetet e Bashkuara të Amerikës, reagime të cilat i kanë dënuar këto krime dhe kanë bërë thirrje për një fund të menjëhershëm të kësaj situate katastrofike.

Grupi popullor "Tatimpaguesit Kundër Gjenocidit" (TAG), së bashku me Komitetin Ndërkombëtar të Shoqatës Kombëtare të Avokatëve, kanë paraqitur një ankesë ligjore në Komisionin Ndëramerikan për të Drejtat e Njeriut, duke akuzuar qeverinë amerikane për mbështetjen e luftës gjenocidale të regjimit sionist kundër Gazës.

Në këtë ankesë historike theksohet se mbështetja ushtarake dhe financiare amerikane për regjimin e aparteidit të Izraelit ka luajtur një rol të drejtpërdrejtë në vrasjen e palestinezëve në Rripin e Gazës. Dokumenti prej 133 faqesh përfshin dëshmi zyrtare nga palestinezo-amerikanë që humbën familjarët e tyre në Gaza gjatë luftës aktuale gjenocidale.

Edhe më herët, në mesin e janarit të vitit 2025, një grup aktivistësh të të drejtave të njeriut në Shtetet e Bashkuara të Amerikës kritikuan ashpër politikat e ish-Sekretarit amerikan të Shtetit, Anthony Blinken, duke kërkuar marrjen e tij në pyetje për mbështetjen e veprimeve që, sipas tyre, "çuan në gjenocidin ndaj popullit të Gazës".

Nëpërmjet një deklarate, këta aktivistë njoftuan: “Gaza po digjet, banorët e saj janë lënë pa strehë, spitalet e saj janë shkatërruar dhe tokat e saj bujqësore janë shkrumbuar. Ky gjenocid, i financuar nga taksapaguesit amerikanë, mban emrin tuaj”.

Aktivistët e kanë akuzuar gjithashtu Blinkenin për shkelje të ligjit amerikan, duke thënë se mbështetja financiare e qeverisë amerikane për Izraelin shkel Aktin e Ndihmës së Huaj (The Foreign Assistance Act) të vitit 1961 dhe Ligjin Leahy (Leahy Law), të cilët ndalojnë financimin e subjekteve që shkelin të drejtat e njeriut.

Amerika është bashkëpunëtore dhe partnere e regjimit sionist në shkeljen haptazi të së drejtës ndërkombëtare. Në fakt, Amerika, si aleat strategjik i Izraelit, është furnizuesja kryesore e armëve dhe municioneve që ushtria e regjimit sionist përdor për të vrarë çdo ditë popullin e pafuqishëm dhe të shtypur të Gazës. Amerika luajti një rol kyç dhe vendimtar në pushtimin e Rripit të Gazës nga Izraeli duke dërguar mijëra bomba me precision të lartë dhe anti-barrierë. Dhe, qëllimisht e me vetëdije të plotë për krimet e regjimit sionist kundër popullit të shtypur të Gazës dhe gjenocidin ndaj tyre, ajo mohoi rolin e bombave precize dhe anti-barrierë të dërguara nga Uashingtoni në martirizimin e mijëra banorëve të Gazës, veçanërisht fëmijëve dhe grave.

Me t’u kthyer sërish në Shtëpinë e Bardhë, presidenti amerikan, Donald Trump, urdhëroi dërgesën e 1800 bombave 1-tonëshe të tipit anti-bunker për në Izrael, dërgesa e të cilave ishte pezulluar nga administrata Biden. Gjithashtu, të martën, më 27 maj, Ministria Izraelite e Luftës njoftoi se avioni i 800-të me ndihma armatimesh amerikane, i cili transportonte mjete luftarake dhe municione, ishte ulur si pjesë e urës së ndihmës ushtarake amerikane për Izraelin. Sipas kësaj deklarate, vëllimi i ndihmave amerikane që kanë mbërritur deri më tani në duart e izraelitëve ka arritur në më shumë se 90 mijë ton.

Shumica e sulmeve dhe masakrave të kryera nga ushtria e regjimit sionist kundër popullit të Gazës dhe vrasja e udhëheqësve të Rezistencës, veçanërisht në Gaza dhe Liban, janë kryer duke përdorur bomba dhe armatime amerikane. Këto ndihma kanë përfshirë edhe pajisje të tilla si automjete të blinduara, municione, pajisje mbrojtëse personale dhe pajisje mjekësore, por bombat disatonëshe për shpërthimin e fortifikatave janë ndër më të spikaturat mes këtyre armatimeve, të cilat, sipas zyrtarëve të regjimit sionist, konsiderohen jetike për vijimësinë dhe forcimin e kapacitetit operacional të ushtrisë së këtij regjimi gjatë luftës aktuale.

Përveç kësaj, Shtetet e Bashkuara të Amerikës kanë vendosur sisteme të avancuara anti-raketë THAAD në Palestinën e pushtuar dhe kanë dërguar forcat e tyre për t'i përdorur këto sisteme në mënyrë operacionale me qëllim forcimin e aftësisë së regjimit sionist për t'u përballur me kërcënimet e mundshme.

Krijimi i kësaj ure ajrore dhe ndihmat e vazhdueshme ushtarake demonstrojnë angazhimin e Amerikës për mbështetje gjithëpërfshirëse për Izraelin, ndërkohë që Uashingtoni, gjatë presidencës së Joe Bidenit, pretendonte se po përpiqej të balanconte mes mbështetjes ushtarake për Izraelin dhe konsideratave humanitare në luftën e Gazës.

Megjithatë, në praktikë, Shtetet e Bashkuara të Amerikës nuk u kanë kushtuar vëmendje konsideratave humanitare, as gjatë epokës së Bidenit dhe as, veçanërisht, gjatë mandatit të dytë të presidencës së presidentit aktual Donald Trump. Në të njëjtën kohë, Uashingtoni është përmbajtur nga ushtrimi i presionit efektiv mbi kryeministrin e regjimit sionist, Benjamin Netanyahu, për ta detyruar atë të ndalojë luftën në Gaza, përveç një armëpushimi të përkohshëm në fillim të mandatit të dytë të presidentit Trump.

Kështu, Amerika duhet të konsiderohet partnere e drejtpërdrejtë e Izraelit në krimet e tij të pashembullta kundër palestinezëve të Gazës, duke pasur parasysh mbështetjen e saj gjithëpërfshirëse politike, diplomatike, po ashtu edhe atë ushtarake dhe në fushën e sigurisë për Tel Avivin, si dhe shtypjen e protestave antisioniste brenda Shteteve të Bashkuara të Amerikës. Ndërkohë që krimet e regjimit sionist, veçanërisht gjenocidi ndaj popullit të Gazës dhe përdorimi i urisë si armë dhe shkaktimi i zisë së bukës në këtë rajon janë çështje të pranueshme e të pamohueshme, Shtetet e Bashkuara të Amerikës kundërshtojnë hetimin e këtyre krimeve nga ana e institucioneve gjyqësore ndërkombëtare, siç janë Gjykata Ndërkombëtare e Drejtësisë dhe Gjykata Ndërkombëtare Penale. Amerika, gjithashtu, ka përdorur vazhdimisht të drejtën e vetos në Këshillin e Sigurimit të Organizatës së Kombeve të Bashkuara në kuadër të vazhdimit të luftës në Gaza.

Megjithatë, ashpërsia e krimeve të Izraelit kundër banorëve të Gazës i ka shtyrë organizatat joqeveritare amerikane të akuzojnë qeverinë amerikane për mbështetjen e gjenocidit të regjimit sionist në Gaza. Në këtë ankesë historike theksohet se mbështetja ushtarake dhe financiare e Shteteve të Bashkuara të Amerikës për regjimin sionist ka luajtur një rol të drejtpërdrejtë në vrasjen e palestinezëve në Rripin e Gazës.  Pavarësisht veprimeve të tilla protestuese, Izraeli, i mbështetur nga përkrahja e pakushtëzuar e Shteteve të Bashkuara të Amerikës, i ka intensifikuar gjithnjë e më shumë sulmet e tij ndaj Gazës dhe vrasjen e banorëve të saj, veçanërisht të grave dhe fëmijëve.