Evropianët në gatishmëri për skenarin amerikan në lidhje me Groenlandën

Pas deklaratave të përsëritura të presidentit të SHBA-së në lidhje me nevojën për të marrë në zotërim Groenlandën, vendet evropiane, veçanërisht Franca dhe Gjermania, po koordinohen për të formuluar një reagim të përbashkët; një reagim që të theksojë ruajtjen e sovranitetit të Danimarkës dhe të drejtave të popullit të Groenlandës dhe të paraqesë një sfidë serioze ndaj çdo veprimi të njëanshëm të SHBA-së.

Aleatët evropianë, të përqendruar te Franca dhe Gjermania, kanë filluar konsultime intensive për t'u përballur me një veprim të mundshëm të SHBA-së kundër Groenlandës. Sipas një burimi nga qeveria gjermane, Berlini po shqyrton skenarë të ndryshëm të reagimit politik dhe diplomatik në koordinim të ngushtë me Danimarkën dhe vendet e tjera evropiane.

Sipas Pars Today, ministri i Punëve të Jashtme të Francës, Jean-Noël Barrot, njoftoi se çështja e Groenlandës do të ngrihet në një takim të përbashkët me ministrat e Punëve të Jashtme të Gjermanisë dhe Polonisë. Duke theksuar nevojën për veprim kolektiv, Barrot tha se Evropa synon të reagojë, por ky reagim duhet të koordinohet dhe të kryhet brenda kuadrit të bashkëpunimit midis partnerëve evropianë.

Ndërkohë, një zyrtar i lartë evropian e ka identifikuar Danimarkën si boshtin kryesor për koordinimin e këtyre reagimeve, megjithëse Kopenhageni ende nuk e ka njoftuar konkretisht llojin e mbështetjes që pret.

Ditët e fundit, liderët e disa fuqive të mëdha evropiane, së bashku me Kanadanë, kanë theksuar në qëndrime të përbashkëta se Groenlanda i përket popullit të saj dhe se e ardhmja e saj nuk duhet të jetë objekt pazarllëqesh me fuqitë e huaja. Këto qëndrime u intensifikuan pasi Donald Trump përsëriti edhe një herë interesin e tij për të kontrolluar këtë ishull strategjik, duke e përshkruar atë si jetik për sigurinë ushtarake të Amerikës. Në të njëjtën kohë, Shtëpia e Bardhë ka folur për shqyrtimin e opsioneve të ndryshme, madje edhe të një opsioni ushtarak; një qasje që është përballur me kundërshtim të hapur nga Europa.

Nga ana tjetër, Danimarka dhe qeveria lokale e Groenlandës kanë hedhur poshtë çdo mundësi shitjeje të këtij ishulli dhe kanë bërë thirrje për dialog të menjëhershëm me Uashingtonin. Zyrtarët danezë, gjithashtu, i kanë konsideruar "të pabaza" pretendimet për praninë e gjerë të anijeve ruse dhe kineze përreth Groenlandës. Pavarësisht popullsisë së vogël, vendndodhjes strategjike dhe burimeve të pasura minerale, Groenlanda është shndërruar në një nga pikat e nxehta gjeopolitike në botë.