Vazhdojnë deklaratat e ashpra mes kandidatëve për president në Amerikë

Në Amerikë kandidatët e dy partive kryesore vazhdojnë të lëshojnë deklarata të ashpra duke ndikuar në rezultatin e sondazheve për fituesin e ardhshëm të postit të presidentit.  Një anketim i ri në nivel kombëtar i publikuar sot, tregon se avantazhi i kandidates demokrate Hillary Clinton përkundër rivalit republikan Donald Trump është ngushtuar së tepërmi.

Sondazhi u krye përpara se FBI-ja të njoftonte se ka prova të reja për çështjen e serverit privat të email-it gjatë kohës që zonja Clinton ishte Sekretare e Shtetit. Anketimi, i kryer nga ABC News dhe Washington Post, tregon një mbështetje prej 47% për zonjën Clinton dhe 45% për zotin Trump në radhët e votuesve të mundshëm. Kjo është një rënie dramatike krahasuar me anketimin e një jave më parë, sipas të cilit zonja Clinton udhëhiqte me 50% mbështetje, përballë 38% për zotin Trump. Drejtori i FBI-së, James Comey, njoftoi dje se agjencia po shqyrton nëse gjendet informacion i klasifikuar në një pajisje që i përkiste ish-ligjvënësit Anthony Weiner, i cili ka qenë bashkëshorti i Huma Abedin, ndihmëse e zonjës Clinton. Rezultatet e anketimit të sotshëm, që e tregojnë zonjën Clinton me vetëm 2% avantazh, bazohen në intervista të kryera nga dita e hënë, 24 tetor, deri në ditën e enjte, 27 tetor, pra një ditë përpara se FBI-ja të shprehej për prova të reja. Anketimi pararendës, që e tregonte zonjën Clinton me 12% avantazh, ishte kryer gjatë periudhës 20 – 23 tetor. Gjatë periudhës ndërmjet dy anketimeve, vetë zoti Trump ka fituar 7% pikë më shumë, ndërsa zonja Clinton ka humbur 3%. Evidentohet një entuziazëm më i lartë në radhët e republikanëve edhe përpara njoftimit të FBI-së. Anketimi aktual tregon se 81% e republikanëve të regjistruar ka gjasa të votojnë, krahasuar me 75% të evidentuar gjatë një anketimi pararendës. Anketimeve u janë përgjigjur 1148 votues të mundshëm dhe mundësia e gabimit është 3%.