Иравонӣ: Шӯрои Амният аз иқдомоти таҳрикомез худдорӣ кунад

Порс Тудей — Сафир ва намояндаи доимии Эрон дар Созмони Милал аз баргузории нишасти Шӯрои Амният дар бораи вазъияти ғарби Осиё ба дархости Баҳрайн интиқод кард ва гуфт: «Шӯрои Амният бояд аз иқдомоти таҳрикомезе, ки метавонад дипломатияро тазъиф кунад ё танишҳоро бештар ташдид кунад, худдорӣ кунад».

Ба гузориши Порс Тудей ба нақл аз хабаргузории Садо ва Симо, Амирсайид Иравонӣ, сафири Ҷумҳурии Исломии Эрон назди Созмони Милал рӯзи панҷшанбе дар нишасти Шӯрои Амният дар бораи вазъияти ғарби Осиё, ки ба дархости Баҳрайн ташкил шуда буд, гуфт: «Авлавият бояд иҷрои комили тафоҳумнома (миёни Эрон ва Амрико) ва идомаи музокирот барои дастёбӣ ба як тавофуқи ҷомеъ бошад. Шӯрои Амният бояд аз ин раванд ҳимоят кунад, риояти комили тафоҳумномаро ташвиқ кунад ва аз иқдомоти таҳрикомезе, ки метавонад дипломатияро тазъиф кунад ё танишҳоро бештар ташдид кунад, худдорӣ кунад».

Иравонӣ гуфт, ки иттиҳомоти беасоси матраҳшуда аз сӯи Иёлоти Муттаҳидаи Амрикоро қотеона рад мекунам. Намояндаи Иёлоти Муттаҳида бори дигар дар талоше мазбӯҳона барои тавҷеҳи иқдомоти таҷовузкоронаи ғайриқонунии худ, ба дурӯғ ва дурӯғпароканӣ алайҳи Эрон мутавассил шудааст.

Вай илова кард: Ҳақоиқ равшан аст. Дар миёни музокироти дипломатик, Иёлоти Муттаҳида ҳамроҳ бо режими Исроил ду бор ба дипломатия хиёнат кард ва ду ҷанги таҷовузкорона алайҳи Эрон оғоз намуд, ки нақзи ошкори Маншури Милали Муттаҳид ва ҳуқуқи байналмилал аст. Ин нақзҳо, таҳдиде ҷиддӣ алайҳи сулҳ ва амнияти байналмилалӣ маҳсуб мешавад.

Иравонӣ гуфт: Ман ҳамчунин иттиҳомоти беасоси матраҳшуда тавассути бархе аз аъзои ғарбии Шӯро ва намояндаи Баҳрайнро рад мекунам. Онҳо ба ҷои пардохтан ба решаи буҳрони феълӣ, таҷовузи ғайриқонунӣ алайҳи Эронро нодида гирифтаанд, дар мувоҷиҳа бо ин тахаллуфоти ҷиддӣ сукут кардаанд ва саъй кардаанд тақсирро ба гардани қурбонӣ биандозанд. Стандартҳои дугона ва рафтори риёкоронаи онҳо, ҳар гуна эътибореро барои мавъизаи дигарон аз онҳо салб кардааст.