Афғонистон қурбонгоҳи кӯдакон
Бар асоси гузоришҳо, Афғонистон дар садри феҳрасти кишварҳое, ки бештарин талафоти кӯдаконро доранд, қарор гирифтааст.
Сандуқи кӯдакони Созмони Милали Муттаҳид (ЮНИСЕФ) бо ироаи гузорише такондиҳанда дар мавриди омори ҷаҳонии талафоти кӯдакон дар ҷангҳо, эълом кард, аз соли 2005 ба ин сӯ ҳудӯди 29 ҳазор кӯдаки афғон дар нооромиҳои ин кишвар кушта шудаанд ва аз ин назари Афғонистон дар садри феҳристи кишварҳое, ки бештарин талафоти кӯдаконро доранд, қарор гирифтааст. Ба ин тартиб наздик ба як сеюми талафоти кӯдакон дар ҷаҳон ба Афғонистон тааллуқ дорад.
Ин гузориши кишварҳои Яман, Сурия ва Эфиопияро низ дар зумра кишварҳое медонад, ки талафоти кӯдакон дар онҳо боло аст. Оморе, ки ЮНИСЕФ мунташир кард бар асоси сабти гузоришҳои расмӣ дар ин кишварҳо сӯрат гирифта ва ЮНИСЕФ бовар дорад, ки эҳтимолан омори талафот дар ин кишварҳо бештар аз аъдоди ин гузориш аст.
ЮНИСЕФ ҳамчунин дар гузориш худ овардааст, ки дар 16 соли гузашта, 266 ҳазор мавриди нақзи шадиди ҳуқуқи кӯдакон низ дар Афғонистон сабт шудааст.
ЮНИСЕФ соли 2022-ро соли таваҷҷуҳ ва талош барои кӯдакон дар вазъиятҳои бисёр ҳассос ва пурчолиш унвон карда ва аз кишварҳои ҷаҳон хостааст то барои беҳтар шудани вазъияти зиндагии кӯдакон талоши бештаре анҷом бидиҳанд.
Бар асоси гузориши ЮНИСЕФ, талафоти кӯдакон дар Афғонистон маъмулан ба ду далел сӯрат мегирад, ҷангҳо ва фақр, ки албатта ҳар ду бо ҳам робитаи наздику танготангӣ ҳам доранд. Дар 43 соли гузашта, Афғонистон даргир ҷанг буда ва ҳузури кӯдак - сарбозон дар ду тарафи хат набард шудааст.
Бештар бихонед:
Авзои номуносиб барои кӯдакони Афғонистон
