Pars Today

Вазири корҳои хориҷии Тоҷикистон насабашро ба номи падари худ гардонда, номи расмиаш дар ҳуҷҷатҳо Сироҷиддини Муҳриддин шудааст. Насаби ӯ қаблан Аслов буд.

Ба иттилои Спутник, акнун дар ҳукумати Тоҷикистон танҳо се нафар – сардори КДАМ Саймӯмин Ятимов ва раисони ҳарду маҷлиси парлумон Маҳмадсаид Убайдуллоев ва Шукурҷон Зуҳуров ному насаби "шӯравӣ”-ашонро нигоҳ доштаанд.

Иваз шудани насаби вазири корҳои хориҷии Тоҷикистон аз як хабари хурди нашршуда дар сомонаи расмии вазорат дар бораи мулоқоти вазир бо намояндагони ташкилоти ҷамъиятии ҷавонон "Созандагони Ватан” маълум шуд. Ин аввалин хабаре буд, ки вазири хориҷаро дар он Сироҷиддин Муҳриддин ном бурданд: "22 майи соли 2018 дар бинои Вазорати корҳои хориҷии Ҷумҳурии Тоҷикистон бахшида ба "Рӯзи ҷавонони Тоҷикистон-23 май” мулоқоти Вазири корҳои хориҷии Ҷумҳурии Тоҷикистон Сироҷиддин Муҳриддин бо намояндагони Ташкилоти ҷамъиятии ҷавонони "Созандагони Ватан” баргузор гашт.”

Ба дунбол дар сомонаи расмии вазорати хориҷаи Тоҷикистон тарҷумаи ҳоли вазирро низ таҳрир карда, ӯро бо насаби нав Сироҷиддин Муҳриддин навиштанд. Сироҷиддин Муҳриддин, ки то ҳол насабаш Аслов буд, яке аз охирин аъзои ҳукумати Тоҷикистон аст, ки насабашро тоҷикӣ кард.

Ҳоло дар раддаҳои аввали ҳукумати Тоҷикистон танҳо се нафар - сардори Кумитаи давлатии амнияти миллӣ (КДАМ) Саймӯмин Ятимов ва раисони Маҷлиси миллӣ ва Маҷлиси намояндагон Маҳмадсаид Убайдуллоев ва Шукурҷон Зуҳуров бо ному насаби "шӯравӣ” боқӣ мондаанд.

Раванди иваз кардани пасвандҳои "ов”-у "ев” аз насабҳои шаҳвандони Тоҷикистон дар ибтидои солҳои 90 оғоз ёфт, вале баъди шурӯи ҷанги шаҳрвандӣ ва рӯи кор омадани ҳукумати рӯ ба Маскав ин раванд барои солҳо мутаваққиф шуд.

Дар соли 2007 раисиҷумҳури Тоҷикистон ба таври ногаҳонӣ эълон кард, ки ному насабашро аз Эмомалӣ Раҳмонов ба Эмомалӣ Раҳмон иваз мекунад. Ин иқдом ба мавҷи нави табдили насабҳои ба истилоҳ "русӣ” дар Тоҷикистон роҳ кушод, вале дар он марҳала мансабдорони баландпоя ба иваз кардани насаби худ майли чандоне нишон надоданд.