Раҳсипор шудани нахустин гурӯҳи зоирони тоҷик ба Сарзамини Ваҳй

Нахустин гурӯҳи зоирони тоҷик ба манзури анҷоми ҳаҷ озими Сарзамини Ваҳй шуданд.

Ба гузориши хабаргузории “Форс”, нахустин гурӯҳи шаҳрвандони Тоҷикистон ба манзури анҷоми маносики ҳаҷ озими Арабистони Саудӣ шуданд.

Дар маросими раҳсипор шудани нахустин гурӯҳи ҳоҷиёни тоҷик дар Фурудгоҳи байналмилалии шаҳри Душанбе, Сулаймон Давлатзода, раиси Кумитаи дин, танзими анъана ва ҷашну маросими Тоҷикистон ва Муҳаммад Абдулазиз Албоди, сафири Арабистон ширкат карданд.

Давлатзода зимни суханоне дар ин маросим, ба зоирони тоҷик оғози сафари ҳаҷро табрик гуфта, таъкид кард, зиёрати Каъба масъулияти ҳоҷиёнро афзоиш медиҳад.

Вай афзуд, шахсе, ки мушарраф ба зиёрати Хонаи Худо мешавад, бояд бо кирдори худ дар ҷомеа барои дигарон сармашқ бошад.

Имсол беш аз шаш ҳазор шаҳрванди Тоҷикистон барои маносики ҳаҷ озими Сарзамини Ваҳй мешаванд.