Сохти корхонаи нави тавлиди семент дар шимоли Душанбе
Ҳукумати Тоҷикистон ва ширкати "Сементи Тоҷик" аз сохти корхонаи нави тавлиди семент дар шимоли Душанбе хабар дод.
Ба нақл аз дафтари матбуотии Кумитаи давлатии мудирияти амвол ва сармоягузории Тоҷикистон, ин корхона дар канори ширкати феълии тавлиди семент дар шимоли шаҳри Душанбе бо ҳазинаи 100 миллион доллар воми молии Бонки содирот ва воридоти Чин сохта хоҳад шуд.
Гуфта мешавад, корхонаи нав дар сол беш аз 1 миллиону 200 ҳазор тонна семент тавлид хоҳад кард.
Бо сохти ин корхона ширкати тавлиди сементи Душанбе, ки қадимитарин маркази тавлиди ин маҳсулоти сохтмонӣ дар Тоҷикистон аст, фаъолияти хешро мутаваққиф мекунад.
Ҳамчунин бар асоси барномаи Вазорати саноат ва технологияҳои нави Тоҷикистон, сохти як корхонаи дигари тавлиди семент дар ноҳияи Ҷалолуддини Балхии вилояти Хатлон бо зарфияти тавлиди 600 ҳазор тонна аз ин маҳсулоти сохтмонӣ дар сол дар назар аст.