Раҳмон ба Рӯҳонӣ: Ба ватани дувуми худ хуш омадед
Раисони Ҷумҳурии Тоҷикистон ва Ҷумҳурии исломии Эрон имрӯз, шанбе баъд аз чаҳор соли сардии равобити ду кишвар бар асари бархе суитафоҳумҳо, якдигарро дар оғӯш кашиданд ва бар беҳтар шудани муносибатҳо таъкид карданд.
Ба гузориши радиои тоҷикии Садои Хуросон, ба нақл аз ИРНА, Эмомалӣ Раҳмон асри рӯзи 15 –уми июн дар Душанбе истиқбол аз Рӯҳониро бо гуфтани иборати “ба ватани дувуми худ хуш омадед” оғоз кард.
Раисҷумҳури Эрон ҳам посух дод, ки худро дар ватан эҳсос мекунад ва омодаи беҳбуди муносибатҳои дуҷониба аст.
Рӯҳонӣ бо ишора ба баргузории иҷлоси СИКА низ ба Раҳмон гуфт: “Шумо иҷлоси муҳимеро мизбонӣ кардед ва ин гуна иҷлосҳо барои ҳаракат ба самти субот ва ваҳдат миёни кишварҳои дӯст аст”.
Рӯҳонӣ изҳор дошт: “Бар ин боварам, ки ин сафар мояи амиқтар шудани равобити ду кишвари мусалмон, дӯст ва дорои алоқаҳои бисёр зиёди Эрон ва Тоҷикистон хоҳад шуд.
Раисҷумҳури Эрон ибрози умедворӣ кард, равобити байн ду давлат ва ду миллат рӯз ба рӯз бештар шавад ва ду кишвар шоҳиди ҳамкориҳои бисёр арзишманд ба нафъи ду миллат ва ба нафъи минтақа бошанд.
Сипас Раҳмон ва Рӯҳонӣ ва ҳайатҳои расмии Тоҷикистон ва Эрон ба баҳсу баррасии вазъияти ҳамкориҳои дуҷониба пардохтанд.
Бар асоси ин гузориш, нишасти ҳайатҳои Тоҷикистон ва Эрон низ баргузор шуд.
Дар ин мулоқот вазирони умури хориҷа, дороӣ, ҳамлу нақл, обу энержӣ ва раиси Кумитаи давлатии амнияти миллии Тоҷикистон ҳузур доштанд.
Дар чаҳор соли гузашта, ба хотири бурузи бархе суитафоҳумҳо равобити ду кишвар то андозае сард шуда буд, аммо бо азми ду тараф барои гарм шудани равобит, дидорҳои мақомҳои Теҳрон ва Душанбе аз чанд моҳ пеш азсар гирифта шуд.
Дар идомаи ин дидорҳо, ба даъвати Эмомалӣ Раҳмон, Ҳасани Рӯҳонӣ барои ҳузур дар конфронси Таомул ва Эътимодсозӣ дар Осиё (СИКА) дар Душанбе ҳузур ёфтааст.
