Дархости беш аз 73 ҳазор тоҷикистонӣ барои муҳоҷират ба Русия
Мудири дафтари намояндагии Вазорати умури дохилии Русия дар умури муҳоҷират дар Тоҷикистон гуфтааст, ки аз соли 2013 беш аз 73 ҳазор шаҳрванди Тоҷикистон барои муҳоҷират ба Русия дархости худро ироа кардаанд.
Владислав Маркевич таъкид кардааст, ки танҳо дар шаш моҳи нахусти имсол 5 ҳазор нафар аз шаҳрвандони Тоҷикистон дархости худро барои муҳоҷират ба Русия дар чорчӯби барномаи мавсум ба интиқоли ҳаммеҳанон ба дафтари ин намояндагӣ ироа кардаанд. Ба гуфтаи вай, дар соли 2018 беш аз ду ҳазору 500 тоҷикистонӣ бо аъзои хонаводаҳояшон, ки теъдоди онон беш аз 10 ҳазор нафар аст, барои муҳоҷират ба Русия дархости худро ироа карданд, ки барои аксари онон ин муҷаввиз содир шуд. Дар шаш моҳи нахусти имсол ҳам ҳазору 100 нафар аз атбои Тоҷикистон барои муҳоҷирати хонаводагӣ ба Русия дархост додаанд, ки теъдоди онон наздик ба 5 ҳазор нафар аст.
Атбои тоҷикистонии мутақозии муҳоҷират ба Русия умдатан ҳафт минтақаи ин кишварро барои кору зиндагӣ интихоб мекунанд.
Ба гуфтаи мудири дафтари намояндагии Вазорати умури дохилии Русия дар умури муҳоҷират дар Тоҷикистон, шаҳрвандони ин кишвар дар муқоиса бо соири ҷумҳуриҳои узви ИДМ дар чорчӯби барномаи мавсум ба интиқоли ҳаммеҳанон аз имтиёзоту тасҳилоти зиёде бархурдоранд.
