"Berdimuhamedowyň" Türkiýe saparynda 13 hyzmatdaşlyk resminamasyna gol çekildi

Iki ýurduň baştutanlarynyň gatnaşmagynda Türkmenistan bilen Türkiýäniň arasynda Ankarada geçirilen gepleşikleriň ahyrynda dürli ugurlar boýunça 13 ikitaraplaýyn hyzmatdaşlyk resminamasyna gol çekildi.

Fars habar gullugynyň şenbe güni beren habaryna görä, Türkmenistanyň prezidenti "Serdar Berdimuhamedow" Türkiýä iki günlük saparynyň çäginde (25-nji -26-nji oktýabr) bu ýurduň prezidenti Rejep Taýyp Ärdogan bilen duşuşdy we gepleşik geçirdi.

Ankarada geçirilen bu gepleşikleriň çäginde Türkmenistandan Hazar deňziniň üsti bilen Türkmenistandan gazyň we elektrik energiýasynyň iberilmegi bilen baglanyşykly meseleler ara alnyp maslahatlaşyldy we tranzit pudagynda ýakyn hyzmatdaşlygy çuňlaşdyrmagyň ähmiýeti nygtaldy.

Şunuň bilen baglylykda, iki tarap bar bolan transport koridorlarynda täze şahanyň döredilmeginiň, esasanam Hazar we Gara deňiz koridorlarynyň netijeliligini ýokarlandyrmak üçin iki tarapyň hem bähbitlerine laýyk gelýändigini tassykladylar.

Berdimuhamedow Türkiýäniň prezidenti bilen gepleşikleriniň dostluk we özara düşünişmek şertlerinde geçirilendigine yşarat edip bu gepleşikleriň dowamynda sebitleýin we halkara syýasatyň möhüm meseleleri, esasanam howpsuzlygy we durnuklylygy üpjün etmek we halkara gatnaşyklarynyň hilini ýokarlandyrmak ýaly meseleler ara alnyp maslahatlaşyldy we ikitaraplaýyn söwdanyň göwrümini ýokarlandyrmagyň ähmiýeti nygtaldy diýdi.

Türkmenistanyň prezidenti, türk kärdeşi bilen geçirilen gepleşiklerden soň metbugat ýygnagynda eden çykyşynda bu gepleşikleriň netijesinde gol çekilen resminamalaryň iki ýurduň arasynda syýasy, söwda we ykdysady ugurlarda hyzmatdaşlygy ösdürmäge kömek etjekdigini aýtdy.

Türkmenistanyň daşary işler ministrliginiň habaryna görä,

Türkmenistanyň Prezidentiniň Türkiýe Respublikasyna resmi saparynyň dowamynda ýokary derejeli gepleşikleriň netijelerinden soň aşakdaky ikitaraplaýyn resminamalara gol çekmek dabarasy boldy:

- Türkmenistanyň Söwda-senagat edarasy bilen Türkiýäniň Palatalar we biržalar birleşiginiň (TOBB) arasynda Türkmenistan — Türkiýe söwda we senagat edarasynyň forumyny (TTCCI) döretmek barada özara düşünişmek hakynda Ähtnama;

- Türkmenistanyň Hökümeti bilen Türkiýe Respublikasynyň Hökümetiniň arasynda audio-wideo önümlerini bilelikde öndürmek boýunça hyzmatdaşlyk etmek hakynda Ylalaşyga;

- Türkmenistanyň Senagatçylar we telekeçiler birleşmesi bilen Türkiýe Respublikasynyň Kiçi we orta kärhanalary ösdürmek we goldaw bermek baradaky guramasynyň arasynda Hereketleriň meýilnamasyna;

- Türkmenistanyň Prezidentiniň ýanyndaky Döwlet gullugy akademiýasy bilen Türkiýe Respublikasynyň Prezidentiniň Adam serişdeleri edarasynyň arasynda adam serişdelerini dolandyrmak babatda hyzmatdaşlygy ösdürmek barada özara düşünişmek hakynda Ähtnama;

- Türkmenistanyň Hökümeti bilen Türkiýe Respublikasynyň Hökümetiniň arasynda tehniki düzgünleşdiriş, standartlaşdyrmak, laýyklyga baha bermek, akkreditirlemek we metrologiýa babatda hyzmatdaşlyk etmek hakynda Ylalaşyga;

- Türkmenistanyň Ministrler Kabinetiniň ýanyndaky Baş arhiw müdirligi bilen Türkiýe Respublikasynyň Prezidentiniň ýanyndaky Döwlet arhiw müdirliginiň arasynda hyzmatdaşlyk etmek hakynda Teswirnama;

- Türkmenistanyň Telewideniýe, radiogepleşikler we kinematografiýa baradaky döwlet komiteti bilen Türkiýe Respublikasynyň Prezidentiniň ýanyndaky Kommunikasiýalar müdirliginiň arasynda köpçülikleýin habar beriş serişdeleri ulgamynda hyzmatdaşlyk etmek barada özara düşünişmek hakynda Ähtnama;

- Türkmenistanyň Bilim ministrligi bilen Türkiýe Respublikasynyň Ýokary okuw guramasynyň müdiriýetiniň arasynda ýokary okuw bilim ulgamynda hyzmatdaşlyk etmek barada özara düşünişmek hakynda Ähtnama;

- Türkmenistanyň Ministrler Kabinetiniň ýanyndaky Ulag we kommunikasiýalar agentligi bilen Türkiýe Respublikasynyň Ulag we infrastruktura ministrliginiň arasynda ulag we maglumat tehnologiýalarynda ylmy-barlag işleri babatda hyzmatdaşlyk etmek barada özara düşünişmek hakynda Ähtnama;

- Türkmenistanyň Hökümeti bilen Türkiýe Respublikasynyň Hökümetiniň arasynda ösümlikleri goramak we ösümlikleriň karantini hakynda hyzmatdaşlyk Ylalaşygyna;

- Türkmenistanyň Hökümeti bilen Türkiýe Respublikasynyň Hökümetiniň arasynda medeniýet babatda hyzmatdaşlyk hakynda Ylalaşyga;

- Türkmenistanyň Hökümeti bilen Türkiýe Respublikasynyň Hökümetiniň arasynda ýaşlar we sport babatda hyzmatdaşlyk etmek hakynda Ylalaşygy durmuşa geçirmek boýunça 2024 — 2026-njy ýyllarda ýaşlar syýasaty babatda hyzmatdaşlyk hakynda Hereketler meýilnamasyna;

- Türkmenistanyň Hökümeti bilen Türkiýe Respublikasynyň Hökümetiniň arasynda meteorologiýa babatda hyzmatdaşlyk Ylalaşygyna gol çekildi.