Türkmenistanda ,Walýutaçylara garşy göreşiň dowamy

Türkmenistanda Walýutaçylara garşy göreşiň çäginde Aşgabatdaky durmuş hyzmaty tehnikasyny satýan bazar ýapyldy.

Türkmenistanda walýuta söwdasyny edýän adamlara garşy göreş dowam etdirilýär.

Birnäçe gün ozal Türkmenistanyň paýtagtyň “Çandybil” bazarynda, durmuş tehnikasynyň satylýan ýerinde barlag başlandy.

– MHM-niň işgärleriniň barlag geçiren bazarynda baş-başdaklyga ýol berildi. Tehnikanyň hatda zawodda gaplanan gaplary hem ýyrtylyp aýryldy. Ýanyndan ýa dükanyndan daşary ýurt walýutasy tapylan satyjylary tussag etdiler, bazar ýapyldy – diýip, “Türkmenistanyň Hronikasynyň” habarçylary habar berýär.

Söwda nokatlarynyň eýeleri öz harytlarynyň nähili ýagdaýda Türkmenistana getirilendigi we daşary ýurtda haýsy pula satyn alnandygy hakynda düşündiriş ýazýarlar.

– Hatda algy-bergileriň bellige alnan depderçesi hem barlanýar. Bu günki günde ýurtda her bir satyjynyň şeýle depderçesi bar. Olarda puluny soň bermek şerti bilen haryt alan adamlaryň atlary we bergileriniň möçberi ýazylýar. Krizis şertlerinde adamlar ähli harytlary – azyk önümlerini, hojalyk harytlaryny, eşikleri we hususan-da gymmat bahaly durmuş tehnikasyny karzyna, puluny soň bermek şerti bilen alýarlar. Eger berginiň möçberi dollarda ýazylan bolsa, bu ýagdaýda düşündiriş ýazmaly we özüňe garşy jenaýat işiniň açylmazlygy üçin para bermeli – diýip, telekeçiler gürrüň berýärler.

Azyk önümleriniň, durmuş himiýasynyň we kosmetikanyň söwdasy bilen meşgullanýan hususy dükanlarda hem şeýle barlag geçirildi.

MHM-niň işgärleri ol dükanlaryň eýeleriniň hem algy-bergi depderçelerini barlaýarlar, walýuta, gadagan edilen haryt – çilim we alkagol  tapmak umydy bilen gapdal jaýlaryny dörýärler we kassalaryny gyzyl-dörjük edýärler.

Paýtagt bazarlarynda geçirilýän barlaglar barada “Azatlyk” radiosy hem habar beripdi. Bu bolup geçýän ýagdaýlaryň fonunda Türkmenistanda dollaryň bahasy arzanlaýar we şu günler ol 15 manat derejesinde saklanýar.

Ýatladýarys, bu barlaglar Ministrler kabinetiniň 5-nji iýulda geçirilen mejlisinden soň başlandy. Sebäbi, şol mejlisde Ykdysady jenaýatlara garşy göreş gullugynyň başlygy Maksat Hudaýgulyýew prezident Gurbanguly Berdimuhamedowa bikanun walýuta söwdasy bilen meşgullanýan adamlaryň bir toparynyň tussag edilendigi barada hasabat  berdi.