Gazada pida bolanlaryň sany artmaga dowam edýär
Ysraýyly Režimiň Gaza Sektoryna garşy guraýan hüjümleri hakynda maglumat berildi.
Ysraýylyň harby goşunynyň Gaza Sektoryna garşy 7-nji oktýabrdan bäri guraýan hüjümlerinde pida bolanlaryň sany soňky 48 sagatda 69 adam artyp 40 müň 74 adama ýetdi.
Gazadaky Palestinanyň Saglygy goraýyş ministrliginden berlen ýazmaça beýannamada, Ysraýylyň 316 günden bäri Gaza Sektoryna garşy guraýan hüjümleri hakynda maglumat berildi.
Beýannamada, Ysraýylyň harby goşunynyň soňky 48 sagatda guran 5 hüjüminde ýene-de 69 palestinalynyň pida bolandygy, 136 adamyň hem ýaralanandygy nygtaldy.
Beýannamada, Ysraýylyň hüjümlerinde pida bolanlaryň sanynyň 40 müň 74, ýaralananlaryň sanynyň hem 92 müň 537 adama ýetendigi ýatladyldy.Beýannamada Ysraýylyň hüjümlerinde pida bolanlaryň esasy böleginiň zenanlardan we çagalardan ybaratdygy nygtaldy.
Ysraýylyň harby uçarlary düýn gije Gaza guraýan hüjümlerini dowam etdirdi.
Ysraýylyň harby uçarlary Gazanyň merkezinde ýerleşýän Az-Zewaýide etrapçasynyň günortasynda öýlerini terk etmeli bolan palestinalylaryň ýaşaýan çadyrlaryny bombalady.
Hüjümlerde azyndan 10 adam pida boldy, köp sanly adam hem ýaralandy.
Gaza şäheriniň Şyh Rydwan etrapçasynda bir öýe guralan hüjümde bolsa 1 adam şehit boldy.
Günortada ýerleşýän Han Ýunus şäheriniň Hamed etrapçasynyň golaýynda hem öýerlerini terk etmeli bolan palestinalylaryň ýaşaýan çadyrlaryna od açyldy.
Ýewropa keselhanasynyn golaýynda ýerleşýän bir öýe guralan hüjümde ýaralananlaryň bardygy nygtaldy.
Şol bir wagtyň özünde,Gaza Sektorundaky ysraýylly ýesirleriň hossarlary hüjümleriň bes edilmegi we ýesir çalşygy boýunça Kataryň paýtagty Doha şäherinde gepleşikleriň dowam edýän günlerinde Premýer-ministr Binýamin Netanýahudan we onuň ministrler kabinetinden ylalaşyga gol çekmegini talap edip, paýtagt Tel-Awiwde protest ýörişini geçirdi.
Netanýahuny we hökümetini Gazada hüjümleriň bes edilmegi hem-de ýesir çalşygy hakyndaky ylalaşygy syýasy sebäplerden yza süýşürmekde günäkärlän ýesirleriň hossarlary, Netanýahuny we kabinetinde ylalaşyga garşy durýan aşa sagçy agzalara garşy şygar aýtdy.
Ysraýylyň 7-nji oktýabrda Gaza Sektorunda başladan hüjümleriniň bes edilmegi üçin taraplaryň arasynda birnäçe wagtdan bäri gepleşikler dowam edýär.
Netanýahunyň Ysraýylda we halkara jemgyýetçiliginde syýasy sebäplerden Hamas bilen ýesir çalşygy ylalaşygyny kabul etmeýändigi habar berilýär.
