Aşgabatda Halkara Media Forum Geçirildi
Foruma Ykdysady Hyzmatdaşlyk Guramasynyň Baş sekretary we Türki dilli döwletleriň hyzmatdaşlyk geňeşiniň (Türki geňeşiň) Baş sekretary gatnaşdylar.
Forumda sebitdäki hyzmatdaşlygyň ösdürilmegindäki aragatnaşygyň we maglumat çalşygynyň ähmiýeti bellenilip geçildi.
“Syýasatşynaslaryň we žurnalistleriň gatnaşmagynda Sebitleýin dialog” atly halkara media-forum Türkmenistanyň Daşary işler ministrliginiň Halkara gatnaşyklary institutynda geçirildi.
Foruma Ykdysady Hyzmatdaşlyk Guramasynyň Baş sekretary, Türki dilli döwletleriň hyzmatdaşlyk geňeşiniň (Türki geňeşiň) Baş sekretary, diplomatik missiýalaryň wekilleri, döwlet edaralarynyň we kärhanalaryň ýolbaşçylary gatnaşdylar. Foruma TRT Awaz kanalynyň Baş sekretary Sedat Sagyrkaýa bilen birlikde 29 ýurtdan 100-den gowrak media we ýaýlym organlarynyň wekilleri sanly wideoaragatnaşyk ulgamy arkaly gatnaşdylar.
Ykdysady Hyzmatdaşlyk Guramasynyň Baş sekretary Hadi Soleýmanpur forumyň dünýä ýurtlary bilen diplomatik gatnaşyklaryň artdyrylmagyna we sebitdäki hoşniýetli goňşuçylyk gatnaşyklaryň özgerdilmeginde möhüm bir çaredigini beýan etdi.
Türki dilli döwletleriň hyzmatdaşlyk geňeşiniň Baş sekretary Bagdat Amreýew bolsa Türkmenistanyň Döwlet baştutany Gurbanguly Berdimuhamedow bilen konstruktiw duşuşyk geçirendigini mälim etdi. Türkmen lideriniň Türkmenistany Türk dünýäsi maşgalasynyň aýrylmaz bir bölegi hökmünde garaýandygyny, Türk Geňeşi bilen gatnaşyklaryň özgerdilmegi babatynda pikirlerini aýdyp geçendigini habar berdi. Türkmenistanyň taryhyň dowamynda Türki dilli döwletler bilen ýakyn doganlyk gatnaşyklar içinde bolandygyny beýan etdi. Şol sebäpli Türkmenistanyň Türk Geňeşiniň aýrylmaz bir bölegidigini belläp geçdi. Aşgabatda saparda bolmakdan hoşaldygyny habar berdi.
Foruma TRT Awaz kanalynyň Baş sekretary Sedat Sagyrkaýa hem sanly wideoaragatnaşyk arkaly gatnaşdy. TRT-nyň Aşgabat şäherinde ýerleşýän TRT wekilhanasynyň üsti bilen Türkmenistanyň taryhyny, medeniýetini, sungadyny we sosial durmuşyny bütin dünýä bilen tanyşdyrýandygyny nygtap geçdi. Türkmen TV bilen TRT-nyň arasyndaky jebisligiň dowam etjekdigini mälim etdi.
Forumdan soň TRT beýanat beren Türkiýäniň Aşgabat şäherindäki Adatdan daşary we doly ygtyýarly ilçisi Togan Oral forumyň hyzmatdaşlygyň ösdürilmegi babatynda möhüm bir missiýany ýerine ýetirýändigini beýan etdi.
Türkiýäniň Aşgabat şäherindäki Adatdan daşary we doly ygtyýarly ilçisi Togan Oral: “Şu gün bu ýerde Türkmenistanyň Daşary işler ministrliginiň Halkara gatnaşyklary institutynda geçirilen maslahatda sebitdäki iki möhüm guramanyň ýolbaşçylarynyň ýagny, Ykdysady Hyzmatdaşlyk Guramasynyň Baş secretary Hadi Soleýmanpuryň, Türki dilli döwletleriň hyzmatdaşlyk geňeşiniň (Türki geňeşiň) Baş sekretary Bagdat Amreýewiň çykyşlaryny diňledik. Ykdysady Hyzmatdaşlyk Guramasynyň Baş secretary Hadi Soleýmanpur we Türki dilli döwletleriň hyzmatdaşlyk geňeşiniň (Türki geňeşiň) Baş sekretary Bagdat Amreýew sebitiň ýurtlaryň arasyndaky hyzamdtaşlyk we jebislik babatyndaky maksatnamalaryny we Türkmenistan bilen iki guramanyň arasyndaky gatnaşyklary we gelejegi bilen baglanşykly meýilleşdirilen taslamalary we şolar baradaky pikirlerini biz bilen paýlaşdylar. Türkiýe taýdan hem Türk Geňeşi hem-de Ykdysady Hyzmatdaşlyk Guramasynyň esaslandyryjy agzasy bolmak taýdan örän netijeli bir gün bolandygyny pikir edýärin” diýip habar berdi.
