“Russiýa Goýlan Sanksiýalar Bes Edilmeli”
Wengriýanyň Premýer-ministri Wiktor Orban, Russiýa goýlan sanksiýa syýasatynyň ýalňyşdygyny we sanksiýalaryň bes edilmelidigini aýtdy.
Wengriýanyň Premýer-ministri Wiktor Orban, ÝB-niň 24-nji fewraldan bäri dowam edýän Russiýa-Ukraina söweşi sebäpli Russiýa goýlan sanksiýa syýasatynyň ýalňyşdygyny we sanksiýalaryň bes edilmelidigini aýtdy.
Premýer-ministr Orban, Wengriýanyň Kossut radiosynda eden çykyşynda, Russiýa goýlan saksiýalar bes edilen halatynda energiýa serişdeleriniň nyrhynyň we umuman alnanda infilýasynyň aşaklajakdygyny, emma munyň üçin ÝB-niň syýasy taýdan karar kabul etmelidigini nygtady.
Sanksiýalar sebäpli Wengriýanyň ozal energiýa serişdeleri üçin 7 milliard ýewro töleýän bolsa şu günki güne 17 milliard ýewro töländigini ýatladan Orban, Wengriýanyň sanksiýalary bökdemek ýaly güýjüniň ýokdygyny emma Germaniýa we Fransiýa ýaly uly döwletleriň sanksiýalara garşylyk görkezip biljekdigini belledi.
Söweş we sanksiýalar sebäpli ýewropalylaryň uly ýitgi çekendigini nygtan Wiktor Orban, “ABŞ söweşde ýeňiş gazandy, Ýewropa bolsa ýeňildi. Russiýanyň ýeňilendigi ýada ýeňiş gazanandygy meselesinde bolsa uly jedelleşik bar. Maddy taýdan Russiýanyň has uly ýigti çekendigi aýdylyp bilinmez” diýdi.
Şeýle-de Russiýanyň hökümediniň metbugat geňeşçisi Dmitriý Peskow, Baş ştabyň başlygy Waleriý Gerasimowyň Ukrainadaky rus harby birikmeleriň başyna geçirilmegi bilen maksatlarynyň üýtgemändigini habar berdi.
Russiýanyň hökümediniň metbugat geňeşçisi Dmitriý Peskow, paýtagt Moskwa şäherinde metbugat işgärleriniň gün tertibiniň ileri tutulýan soraglaryna jogap berdi.
24-nji fewraldan bäri dowam edýän söweşde Donetsk sebitinde Ukraina bilen Russiýanyň arasynda aldym-berdimli söweşleriň dowam edýän Soledar şäherindäki ýagdaýyň üstünde durup geçen Peskow: "Soledarda ägirt uly işler edildi. Şol işler dowam eder. Ýogalan gahryman esgerlerimizi hatyralarys, emma öňümizde entegem köp iş bar. Durmagyň wagty däl. Esasy işler entek başlamady" diýip belledi.
Peskow Gerasimowyň düýn Ukrainadaky "ýörite harby operasiýadan" jogapkär Birleşen harby güýçleriň başyna geçirilmegi bilen bagly: "Baş serkerde Russiýanyň Döwlet baştutany Wladimir Putin täze maksatlar kesgitlemedi. Ozalky ähli maksatlar gün tertipde galmaga dowam edýär" diýdi.
Donetskiň we Luganskyň 2014-nji ýyldaky serhetlerine görä "azat edilmeginiň" gün tertipde bolup-bolmandygy bilen bagly soraga Peskow: "Elbetde olar hem Russiýanyň sebitleri, azat edilmekleri gerek" diýip aýtdy.
