Russiýa: "Ukraina ammiak turbasyny partlatdy" diýdi
Russiýa ukrainaly sabotaž we gözegçilik toparlarynyň Harkow sebitiniň golaýynda Tolýatti-Odessa ammiak torba liniýasyny partladandygyny habar berdi
Russiýanyň Goranmak ministrliginden berilen beýanatda, 5-nji iýunda Moskwa wagty bilen sagat 21:00-da Harkow sebitindäki Masýutowka ýaşaýyş zolagynyň golaýyndan geçýän ammiak turbasynyň partladylandygy mälim edildi.
Beýanatda: "Ukrainaly sabotaž we gözegçilik toparlary Harkow sebitiniň golaýynda Tolýatti-Odessa ammiak torba liniýasyny partlatdy. Şol terrorçylykly aksiýanyň netijesinde asuda ilatyň arasynda ýitgiler çekildi. Şol adamlara lukmançylyk kömegi berildi" diýip habar berdi.
Russiýanyň Daşary işler ministrliginiň metbugat geňeşçisi Mariýa Zaharowa, partladylan turba liniýasynyň abatlaýyş işleriniň 1-3 aý aralygynda dowam edip biljekdigini, wakany derňemek üçin tagalla etjekdiklerini aýan etdi.
Zaharowa turba liniýasyny ýaňdandan işletdirmek üçin Ukraina tarapynyň gyzyklanma bildirmeýändigini belledi.
Şol bir wagtyň özünde, Ukrainanyň Goranmak ministriniň orunbasary Anna Malýar, sosial media hasabyndan beren beýanatynda, ýurduň gündogar frontyndaky ýagdaý barada maglumat berdi.
Gündogaryň çaknyşyklaryň güýç merkezi bolmaga dowam edýändigini aýdan Anna Malýar: "Bahmut ugrunda birikmelerimiz goranyşdan hüjüme geçdi. Soňky 1 günde Bahmut ugrunda käbir ýerlerde 200 bilen 1100 metr aralykda öňegidişlik etdik" diýip mälim etdi.
Anna Malýar ruslaryň ady agzalýan ýerde goranyş pozisiýasyna geçip, liniýalaryny elinde saklamaga synanyşýandygyny belläp: "Duşman häzirki wagtda özüni goramak üçin ätiýaçlaryny uzak ýerlerden sebite getirýär" diýip habar berdi.
Russiýanyň howpsuzlyk kärhanasy Wagneriň hakyna tutma söweşijileriniň tyldaky birikmelerde galandygyny aýdan Anna Malýar, häzirki wagtda Russiýanyň howadan hüjüm edip, söweşjeň operasiýalar geçirýändigini aýan etdi.
2022-nji ýylyň 24-nji fewralynda Russiýanyň Döwlet baştutany Wladimir Putin, Ukrainanyň basylyp alynmagy barada buýruk beripdi, şeýlelik bilen Russiýa-Ukraina uruşy başlapdy.
