Qəncə hadison beynəlxalğə KİV -on diğğətədə

Qəncə hadisəku 1 manqisən vey vaxt dəvardə, əmo əv hələən beynəlxalğə Mass-medion diğğətədə mandedə. Dınyo dıjdə informasiya aqentiyyətonədə qıley - "Reuters" bə ım hadisə aid qıley hevujə məğalə dərc kardəşe. "Azadlıq.info" həmonə məğalə tərcumə bəştə əhandon nəzə rosniəşe.

"Reuters" Qəncə icra sərdari de qolulə je fakti bə hakim zumrə bənə qıley çəşnavi ğıymət dodə. Muəllif votedə ki, hokumət Yunis Səfərovi Azərbaycanədə islamə devlət onoe məğsədinə terrorə qrupi uzv bıe elan kardışe, əmo bımi dair hiç qıley mənbə və subit bə miyon nınoşe. Qəncə sakinonədə 11 nəfər bə muxbiri parson cəvob doe rozi bıən. Çəvonədə cəmi 1 nəfəri - Musavat partiya uzv Cahanqir Əmirxanlı çey nomi oşko karde rozi bıə, əmandəyon çe hokuməti repressiyaku tarse səbəbiku anonim qəp jəşone. Həmonə 11 nəfərədə 8 nəfəri bə muxbiri Yunis Səfərovi barədə hokuməti votəyon bovə nıkarde, ey Elmar Vəliyeviku ğisas se votəşone. Çunki Vəliyev şəhəri sakinon və çəvon dini imoni təhğir kardedəbe. Həmonə respondenton ımən əlavə votəşone ki, Vəliyev Qəncə bənə ıştə feodalə mılki idarə kardedəbe. Şəhəri kosibə sakinon, dini cameə daima bə çey təhğir və hoziəti məruz mandedəbin. Şəhərədə bekorəti səviyyə xeyli barze, bı səbəbən əsasən cıvonon bə Turkiyə və Rusiya muhacirət karde məcbur bedən.

Qəncə 84 sinninə qıley sakini votəşe ki, de obodəti eğande nomi çey kə rıjniəşone, şəhəri rəhbəriyyəti tosə ısət bey nə kompensasiya, nəən mənzil doə nişe. De ım məsələ əlağədar Vəliyevi ğəbulədə bıə, əmo çey tərəfo bə hoziə rəftori rast omə.

Məğalə orəxədə muəllif nıvıştedə ki, Avropa çe Rusiya ğaziku ıştə jidastiəti bə kam karde ro bə Cənubə Ğazə Dəhlizi yolə umu hestışe. 2020-minə soriku Az.R de ım lulə bə Avropa har sor 16 mld. kub metr qaz dəvunie sıxan doəşe.