Boku har voşi bəpeş bə Venesiya oxşəş dodə.

Boku şəhəri Sər memar hestışe, əv həmən bə Boku Memarəti və Şəhəreğandə Sər idarə rəhbərəti kardedə. Dəvardə rujon qıleyədə əvşon bə Boku meriya qıley barzə vəzifədari məhkəmə bənə şoydi vanq kardə, eyən məhkəmədə etiraf kardəşe ki, çey vəzifə əsıl həğiğətədə formale, Boku icra sərdari dəsturon bedune şərt icra kardedə

Isət Respublika paytaxtədə a`nədə kortəbii, həjəmə inşaatə koon bə xeyli problemon səbəb bıə. Çəvono qıleyən ıme ki, voş voəcəğin Boku şəhəri kuçəon ovi dılədə ğərğ bedə, ıqlə ım mandedə ki, şəhəri sakinon bənə Venesiyavojon şəhərədə de kulosi hərəkət bıkardon. Hiçən təsaduf ni, həmən ım curə yabuə siyasəti nəticəy ki, Boku dınyo sivil şəhəron reytinqə siyahiədə həmişə orəxnə vıronədə ğəror qətedə.

“Sputnik Azərbaycan” sayti Bokuədə voşi ovi bə əməl vardə işkilon həxədə qıley tədğiğat bardəşe, məlum bıə ki,  sentyabri 28-ədə maştəvoy voşi bino kardə nim saati bə peş paytaxti Binəqədi istiğamətədə, Nizami, Ğaradağ rayononədə, Xətai rayoni Zığ, Sabunçu rayoni Zabrat ərazionədə roon ovayzi eğətəşebən. Şəhəri əji Sədi Məmmədovi qəp jəşe ki, kuçəon ovi eğəte səbəbiku çey maşin 2 saat Heydər Əliyev xiyabanədə probkadə mandə, əv bə ko vaxtədə rəse zınəni.

“Azərsu” Ojə Səhmdarə Cəmiyyəti mətbuatə katib Anar Cəbrayıllı bo sayti izah kardəşe ki, çe paytaxti ısətnə kanalizasiya şəbəkə dəvardə əsri 70-minə soronədə onoə bıə. Çə vaxtiku Boku canədə inkişaf kardəşe, şəhəri mərkəzədə xeyli osmoniçinqilə binaon bə meydon omə. Həmonə bina çırkovon bə i qılə kanalisasiya ru bedə. Bı səbəbən voş voədə şəhəri mərkəzi hissə kanalisasiya sistem an ğədər ovi dəvunie imkanədə bedəni, şəhəri roon ovi jitono mandedə.

Cəbrayıllı ımən votəşe ki, voşi ovon de kanalizasiya şəbəkə ru karde ğədəğəne. “Ovə təchizat və çırkovon həxədə» ğanuni 39-minə maddədə bı barədə xususi bənd heste. Jıqo vəziyyətədə voşi ovi de kanalizasiya ru karde, həmən bə sanitariya ğaydon zidde. Şəhərədə muxtəlifə siyarətkardə mərəzon pevolo bıe ro şərait bə əməl varde bəzıne. Boku şəhəri İcra hakimiyyət jıqo qıley vəziyyəti çe arə peqəte ro bəpe voşi ovi ru kardə əleydə xətton inşa bıkardo. Bəvədə paytaxti sakinon har sor voşə mevsumədə mutəmadi norohət kardə ım problemi həll karde mumkun bəbe.

İbrimi Zahirəddin, çe Rusiya Yekaretinburğ şəhəriku, İİR sədo, tolışi sədo.