Pokiston,çe Talibani hukuməti bə rəsmiyyət zıneydəni
Pakistoni alimon cəmiyəti partiya sədr bəyonış kardə: Pakiston beynəlxalğə sistemiku qıləy baxş bə hisob omeydə və co qılə kişvəron bənav, Əfğanıston Talebani hukumət rəsmi zıneydə ni.
Miladi 2021 minnə sori Avqustə manqədə və sənibəton Taleban bə zumandəti rəsey zəmoniku beynəlxalğə ğanuni bey bə dast vardeyro vey cəhd kardedə. əmmo beynəlxalğə təşkilaton və kişvəron əcumlə Ğərbi kişvəron həmişə Əfğanıstonədə Talebani mıvəğğətə devlət bə insoni həxon darıştey mıttəhəm kardedən. Talebaniku vey uhimmə dınyo tələb, har cəhətinə hukumət, bə şahrvandon həxon ehtırom noey əcumlə Əfğanıstoni jenon ko həx və kinəon təhsili zıney bə hisob omeydə.
Pakistoni alimon cəmiyəti partiya sədr, Molana Fəzlorrəhman ki tojən Kabilədə de Talebani hukuməti ali rəsmi şəxson vindemonış kardə be, de Əfğanıstoni milli televeziya qıləy votımonədə ki soalış kardə be boçi Talebani zıney barədə İslamabad hiç qılə hərəkət əncom doəş ni, cəvobış do: Pakiston həm dınyo ictimaku i qılə baxş bə hisob omeydə və pidəşe de dınyo həm cəhət hərəkət bıko, əv ijən əlovəş kardə: Pakistoni səmtiku Taleban coyləti mumkine ki problemon icod kardey bois bıbu.
Pakistoni alimon cəmiyəti partiya sədr ijən Pakistoniku Əfğanıstoni pənoh vardə kəson ixroc bey meczu barədə bəyonış kardə 2 qılə kişvər bəpe ım barədə həmkoəti və həmohənqişon bıbu ta miqranton de problem dim bə dim məbon.
