Pakistoni məzhəbi iyən siyosi rəhbəron, Fələstini komək kardeyro bə islomi vəhdət təkidışon kardə
Pakistoni Bəluçıstoni ştati alimon, iyən siyosi və məzhəbi kali rəhbəron, sionist rejimi qenosid rejimi cinoyəton vədə Fələstini komək kardeyro bə İslomi vəhdəti zumand kardey zərurət təkidışon kardə.
Bə Tele-Rədio aqentiyəti raporti əsos, de islomofobiya mubarizə barde beynəlxalğə ruji həmzəman iyən Bə Rəməzan mıburəkə manqi mınosibəti xoto, İron İslom Respublika sərkunsolqəriədə, qıləy iclos bərpo bıə ki ım iclosədə koveytə şəhri muxtəlifə qrupon, mıxbiron, taciron, siyosi rəsmi şəxson iyən kali alimon, de Ğəzzə tanqə məzlumə milləti ıştə hambasteqi nışo doşone.
Koveytiyədə İron İslom Respublika sərkunsol Həsən dərvişvənd həm ım iclosədə bə Fələstini bəşərdustanə koməkon vığandeyro bə İslomi ittifoğ və hambasteqi təkidış kardə iyən votışe: ımsor Rəmzanə manq İslomi ummətiro vey dardnok iyən təəsufine, boçi ki sionist rejimi işğolçi iyən vəhşiyə rejim de Amerkə və co qılə ğərbi kişvəron himoyə, 31 həzo nəfəriku vey hırdən, jen və ğeyri hərbion şəhid kardışone və de mıhosirə vositə, Ğəzzə sakinon vəşiyanəti və noxəşəti vəziyətədə ğərorış do.
