İslomi İnğilobi Yolə Rəhbər: de Ermənistoni əloğəon har rujnə inkişof doey siyosət ijən dəvom peydo bəkarde
İslomi İnğilobi Yolə Rəhbər de Ermənistoni iminnə vəziri vindemonədə bə Seyd İbreym Rəyisi şəhodəti xoto, çəy həmdardiş təşəkkur kardə və de işorə bə İron və Ermənistoni mıştərəkə mənafe və coqrafiya iyən torixi mıştərəkəçiyon əlovəş kardə: de Ermənistoni rabitəon, İroni harrujnə hevujəti siyosət dəvom peydo bəkarde.
Bə Yolə Rəhbəri məlumatərosnə mərkəzi raporti əsos, zinə Tehronədə, İslomi İnğilobi Yolə Rəhbər Həzrəte Ayətullah Xamenei de Ermənistoni İminnə vəzir Nikol Paşiniyani vindemonədə de işorə bə 2 qılə kişvəri rabitəon stratejik bey, Ermənistoni iminnə vəziri təkid, ijən əlovəş kardə: az bə ım xoto bə 2 qılə kişvəri həmkoətion hevujəti və inkişof təkidım heste ki ım rabitəon stratejik bıbu əmmo muhimm ıme ki 2 qılə kişvəri miyono rabitəonədə muxalifoni hestin ki bə həminə əsos, bəpe 2 qılə kişvəri məsələon de diğğət və mığət əncom bıbu.
Həzrəte Ayətullah Xamenei ijən əlovəş kardə: çəmə bə rəhmət şə prezdent, Ermniston iyən çəy ətrofədə hodisəon və marzi məsələon vey həssos be və bəpe ım mığəton və həssosiyəton ijən dəvom peydo bıko və əmə bəpe ıştən bıznəmon ıştə mənafe təmin bıkon.
Im vindemonədə ijən Ermənistoni iminnə vəzir Nikol Paşiniyan Ermənistoni devlət və milləti həmdardi elonış kardə və votışe: əmə həvoi hodisədə, İroni prezdent iyən xarıci vəziri və çəvon bə ico bıə heyəti bə rəhmət şe xəbə məseyku vey təəccu kardımone əmmo jəğo ki şımə işorə karderon, xotircəm hestimon ki de şımə rəhbəri və hidoyəti vositə, İroni koonədə hiç problem icod nibəome.
Şərği Azərbaycan ostani Vərzəğan məntəğədə iyən İroni prezdenti vertəliyotiro icod bıə hodisədə milləti xadim, Seyd İbreym Rəyisi və deəy bə ico bıə heyət şəhid be.
Bə İrib raporti əsos, İroni prezdent ki zinə Şərği Azərbaycan ostanədə çand qılə proyekti bə istismor rosniyeyro bə ın ostani səfəş kardə be, çəy helikopter suğutış kardə.
Qıləy holədə ki imdodi təşkilot və ğıvvon i minnə ləzəku ıştə koy bıno kardışone, oxoysə millət və imdodəkəyon de İronıjə dronon vositə hodisə vində vertəliyoti pəydo kardışone.
In hodisədə İroni xarıci vəzir Huseyn Əmirəbdullahiyan, Təbrizi imom cumə Ayətullah Seyd Muhəmməd Əli Ali- Haşim və Şərği Azərbaycan ostani ostandor Malik Rəhməti həm şəhid bin.
