Ruhani: Amerkə, Fransə və İnqiltərə bə Suriyə bıə həmlə qıləy təcavuz be.
İroni prezident de kimyəviyə silohon bəhonə bıə bə Suriyə hərbi təcavuzi ım kişvərədə bə məğlub bıə terroriston komək karde hədəf və məğsədış be.
Həsən Ruhani zinə de Rusiyə prezident Putin telefoniyə rabitə cərəyonədə votışe: əqə jıqo vey rohət bə co kişvəron hərbi təcavozi imkon bıbu yəğin dınyoədə bəbe tojə be stabilətion çəş kəmon.
İroni prezident əlovəş kardə: ım təcavoz sabitış kardə Amerkə iyən terrorçiyon miyono rabitəon heste və zəmoni ki əvon Suriyə şərği Ğutəku çəvon dast keto be ım huccum əncum be.
Ruhani təsdiğ kardə ki ım Suriyədə de terrorizm mubarizə barədə sahədə tojə problemon iyən İron və Rusiyə miyono tojə həmkarion bois bəbe bə çəyro İron bo əloğəon və muzakirəon miğdori ziyod kardero hozzoe.
Veladimier Putin həm bə İron və Rusiyə miyono mıştərəkə vindımon işorəş kardə və votışe: Amerkə və ğərbiyə kişvəron bə Suriyə bıə həmlə de har curnə bəhonə çı beynəl xalğ ğanuni arşiyə mənodəy.
Putin təsdiğ kardə ki Amerkə və Amerkə dostə kişvəron ım iddio be əsos iyən jıqonə həmləon bənə beynəl xalğ cinoyət iyən təcavoz hisob bedə.
Rusiyə prezident təsdiğ kardə ki təcavozkaron ım hərəkət məntəğə və Suriyədə de terrorizm mubarizə bardero çəmə vindemon və siyasi əvəz ni bəkay ijən İron, Tırkiyə və Rusiyə miyono muzakirəon hejo dəvomış bəbe.
