De Xanım Həzrəte Fatimə Zəhra(s) şəhodətə ruji mınosibəti səbəsəloməti.
Imruj Hicri Ğəməri 1440-nə sori Cəmadiul Sani manqi 3 iyən 2019-nə sori Fevrali 9-nə ruje, bə təğvimi əsos ımruj de Xıdo Rəsul(s) qiramiyə kinə iyən dınyo şiəyon 1-nə İmom Həzrəte Əli(ə) qiramiyə həyot həmro şəhodəti sorqərdışi bərobəre.
De Həminə matəmə əyyami mınosibəti çı Əhli-beyt(ə)-i aşiğon əzodorəti mərasimon bəpoşon karde.
Məşhədədə bıə şiəyon 8-nə İmom Həzrəte Rıza(ə), Ğomədə bıə Xanım Məsumə(s) pokə hərəmon iyən co vırəon əcumlə məçidon və Huseyniyəonədə zinə şəviku cəmaəton çı əzodorəti mərasimonədə iştirokışon karde ta ıştə iradət və eşği bə fəzilət, iffət iyən isməti simvol xanım Seddiğe Kubra(s) nışo bıdən.
Həzrəte Fatimə Zəhra(s) Beesəti 5-nə sori Cəmadius Sani 20 Məkkəədə bə dınyo omə.
Ə Həzrət Hırdənəti faxtiku ıştə qiramiyə dədə Həzrəte Muhəmməd(s) hidoyəton jentonədə de İlahi məərif oşno be, ijən ıştən çı Xıdo dərqah məxsusə bandəon iyən İlahi elmon sərçəşmə be.
Həzrəte Fatimə Zəhra(s) jimoni həmmə ləhzəonədə isor, səbr, qızəşt, qinaət, səxavət, Xıdo ibadət iyən bə fəğıron komək kardeku nımonəon de aliyə sima və obrazi muşahidə əbi ijən vey yolə tarix əsoxtə şəxsiyəton bənə İmom Həsən(ə) iyən İmom Huseyn(ə) əXanımi tərbiyə vositə pırosniyə bıən.
Oxo ə Həzrət 18 sor jimon bəpeştə çandə zəmonə hakimon zılm və sitəm ijən ıştə qiramiyə dədə Peyğumbər(s) bəfoti dard-ğəmi xoto bə bəzi rəvayəton əsos Hicri Ğəməri 11-nə sori Cəmadiu-Əl-Əvvəli 13 ijən de co rəvayəton bərobər Cəmadiul Sani manqi 3-nə rujədə bə şəhid be.
İroni Rəşt şəhri Tolışi Rədio tərəfo çı Xanım Həzrəte Fatimə Zəhra(s) şəhodəti sorqardışi bəşımə səbəsəlomətəti ərz kardedəmon.
