Suriyə buməlarzə barədə, ğərbion rəftoriku Tehroni cımə nımoji xətibi tənğid

Tehroni cımə nımoji xətib Suriyə buməlarzə barədə ğərbi kişvəron rəftoronku tənğidış kardə.

Fevralə manqi 6 minnə rujədə, Tırkiyə cənub və Suriyə şimol məntəğəonədə, 2 qılə buməlarzə de 7.5 və 7.8  zumandəti omə ki çəy cərəyonədə Tırkiyədə 38 həzoku vey və Suriyədə həm 5 həzoku vey ıştə coni dastiku doəşone.

Suriyə buməlarzə, co kərə ğərbi kişvəron anti bəşəri rəftoron nışoş do boçi ki Amerkə və Avropa zalımonə sanksiyaon mane bıə ki Suriyədə bə buməlarzə vində kəson imdod və komək bıbu.

Bə Təsnim aqentiyəti raporti əsos,  Tehroni cımə nımoji xətib Huccətul İslom vəlmuslemin Muhəmməd Cəvad Hac Əli Əkbəri ıştə xotbəonədə bəyonış kardə ki Tırkiyə və Suriyə kişvəronədə Buməlarzə icod bey, qıləy yolə faciə be. əv ijən əlovəş kardə: qlobal ictima ım imtivonədə rısvo bıən.

Huccətul İslom vəlmuslemin Muhəmməd Cəvad Hac Əli Əkbəri ijən təsdiğış kardə, Amerkə iyən Avropa əxloğhi cəhəto suğut bey dıço bıən və Suriyə buməlarzədə ıştə çırkinə zoti nışo dodən.

Tehroni cımə nımoji xətib ijən İron İslom Respublika səmtiku bə Tırkiyə və Suriyə kişvəron ğıvvə və şələ vığandeyku ıştə umo bəyonış kardə və votışe: de İroni millət və məntəğə milləton cəhdon vositə, Tırkiyə və Suriyə milləton dard və ğəmon kam bıbu.

Huccətul İslom vəlmuslemin Muhəmməd Cəvad Hac Əli Əkbəri ijən bə Çin kişvəri İron İslom Respublika prezidenti səfər həm işşorəş kardə və votışe: ım səfər 2 qılə kişvəriro milliyə təsiron və həmçınin məntəğə və beynəl xalğ təsironış heste ki bəzi ım təsiron ısət həm vindey bəbe və bəzi həm vəomeyədə vindey bəbe.