De İmom Xomeyni(r)-i fikon İslom dınyo problemon həl kardey iclos

İroni şimol şərğ, Xorasan rəzəvi ostani mərkəz, Məşhədədə de İron və Əfğanıstoni mərkəzon həmkoəti, “de İmom Xomeyni(r)-i fikonku istifodə kardey vositə, İslom dınyo problemon həl kardey” iclos bərpo bıə.

Bə İran Peres aqentiyəti raporti əsos, ım iclosədə ki işəmbə rujədə və de İron İslom Respublika yolə təsisəkə İmom Xomeyni(r)-i 34 minnə sorəqardışi həmzəman bərpo bıə, Əfğanıstoni koşınoson, fərhənqion, mıhociron və təşkiloton nımoyəndəon ijən Məşhəd şəhri milləti nımoyəndəon, deşmonon xəbisə planon vədə huşinəti və islomi oğoətiədə bə İmom Xomeyni(r)-i rol təkid kardışone.

Im iclosi natığon ijən İmom Xomeyni(r)-i partiyaədə vəhət və i bey vey muhimmə stratejik zınəşone.

Məşhədədə bıə Əfğanıstoni tebyani ictimai mədəni fəaliyəton mərkəzi təşkiloti yol, Huccətul İslom Muhəmməd Haşımi Rasti votışe: be şək İmom Xomeyni(r)-i nəzəku, bə ğovm, toyfə, erğ və zıvoni əsos vəhdət botile.

Haşımi Rasti ijən əlovəş kardə: İmom Xomeyni(r)-i məktəb və partiyaədə vəhdəti amilon, islom dınyo problemonku xarıc beyədə dınyo mısılmonon roy çerağe.