Bə Ğəzzə İroni humanitarə koməkon iminnə bo vığandə bıə
İroni Hilale Əhməri cəmiyəti rəyis bə Ğəzzə İroni humanitarə koməkon iminnə bo vığandeyku xəbəş do.
Bə Fars aqentiyəti raporti əsos, İroni Hilale Əhməri cəmiyəti rəyis Pir Huseyn Kolivənd votışe: iminnə koməkon bo təğribən 60 ton xorək və damon maddonku şomil bəbe.
Kolivənd ijən dəvomış do: tosə dışəmbə co qılə bo kəşti royku ki təğribən 20 həzo ton zərfiyətış heste vığandə bəbe.
İroni Hilale Əhməri cəmiyəti rəyis ijən təsdiğış kardə: cəhdımon heste ki Rəfəh dəvardəco marzədə və zəxmin bıə kəsoni mıolicə kardeyro 3 qılə səyyarə noxəşxonə icod kəmon ya ım ki zəxmin bıə kəson bə noxəşxonəon vırə bə vırə kəmon.
De Ələğsa Tufani əməliyot bəştə 4minnə ruj varid bey və bə sionist rejimi ələyh canqədə de muğaviməti canqəkəyon vositə mislış nıbıə səbarzətion kəsb kardey dəvomi, israili ləşkər ki de Fələstini canqəkəyon mubarizə bardeyədə bezu bıən, de Ğəzzədə damoni, məçiton və sakin bıə məntəğəon iyən Fələstini avarəon qırd bey ya ictimaon vırəon bombardımon kardey, 4 həzoku vey Fələstinıjon ki vey hırdən və jen bin şəhid kardışone.
Bə rəsmi raporton əsos, tosə ısət, 13 həzo 500 fələstini, de sionist rejimi bombardımoni vositə zəxmin bıən.
